Қазақстан Республикасы Yкiметiнiң заң жобалау қызметiн жетiлдiру жөнiндегi шаралар туралы

Қазақстан Республикасы Үкіметінің 2000 жылғы 11 қыркүйектегі N 1376 Қаулысы

Жаңартылған

      Заң жобалау қызметiн жетiлдiру мақсатында Қазақстан Республикасының Үкiметi қаулы етеді:

      1. Заң жобалау қызметi мәселелерi жөнiндегi ведомствоаралық комиссия мынадай құрамда құрылсын:

Түсіпбеков                     - Қазақстан Республикасының Әділет
Рашид Төлеутайұлы                министрі, төраға

Қосдәулетов Дулат Рашитұлы     - Қазақстан Республикасының Әдiлет
                                 вице-министрi, төрайымның
                                 орынбасары

Тәжияқов Бейсенғали            - Қазақстан Республикасының Ұлттық
Шамғалиұлы                       Банк төрағасының орынбасары
                                 (келісім бойынша)

Уақпаев Марат Сұлтанұлы        - Қазақстан Республикасы Парламентi
                                 Сенатының Аппараты Құқықтық
                                 сараптама бөлiмiнiң меңгерушiсi
                                 (келiсiм бойынша)
 
Жәкенов Асқар Серiкжанұлы      - Қазақстан Республикасының
                                 Премьер-Министрi Кеңсесiнiң Заң
                                 бөлiмi меңгерушiсiнiң орынбасары
 
Бектұров Азат Ғаббасұлы        - Қазақстан Республикасының Көлiк
                                 және коммуникация вице-министрi
 
Калюжный Вячеслав Афанасьевич  - Адам құқықтары жөнiндегi ұлттық
                                 орталық басшысы (келiсiм бойынша)

Жиреншин Қазбек Әбусағитұлы    - "Қазақ гуманитарлық заң
                                 университетi" акционерлiк қоғамы
                                 конституциялық құқық және
                                 мемлекеттiк басқару кафедрасының
                                 меңгерушiсi, заң ғылымдарының
                                 докторы, профессор (келiсiм
                                 бойынша)

Құдайбергенов Ескендiр         - Қазақстан Республикасы Табиғи
Көпбосынұлы                      монополияларды реттеу агенттiгi
                                 төрағасының орынбасары
 
Бәшiмов Марат Советұлы         - Еуропалық құқық сараптау
                                 институтының директоры, Қазақстан
                                 Республикасы Президентiнiң
                                 жанындағы Мемлекеттiк басқару
                                 академиясының профессоры,
                                 Қазақстан Республикасы
                                 Президентiнiң жанындағы Адам
                                 құқықтары жөнiндегi комиссияның
                                 сарапшысы

Бычкова                        - Қазақстан Республикасының
Светлана Федоровна               Парламенті Мәжілісінің депутаты
                                 (келісім бойынша)

Дәленов                        - Қазақстан Республикасының
Руслан Ерболатұлы                Қаржы вице-министрі

Мамытбеков                     - Қазақстан Республикасының
Еділ Құламқадырұлы               Индустрия және сауда вице-министрі

Бөрібаев                       - Қазақстан Республикасының Мәдениет
Асқар Исмайылұлы                 және ақпарат вице-министрі

Өскенбаев                      - Қазақстан Республикасының
Қайырбек Айтбайұлы               Туризм және спорт вице-министрі

Никитинская                    - "Атамекен" Одағы" Қазақстанның
Екатерина Сергеевна              ұлттық экономикалық палатасы"
                                 заңды тұлғалар бірлестігі
                                 төрағасының бірінші орынбасары
                                 (келісім бойынша)

Ақылбай                        - Қазақстан Республикасының
Серік Байсейітұлы                Парламенті Сенатының депутаты
                                 (келісім бойынша)

Жалмағамбетова                 - Қазақстан Республикасының
Светлана Жақиянқызы              Парламенті Сенатының депутаты
                                 (келісім бойынша)

Меркель                        - Қазақстан Республикасы Бас
Иоган Давидович                  прокурорының бірінші орынбасары
                                 (келісім бойынша)

Иманқұлов                      - Қазақстан Республикасының
Еділбай Исламұлы                 Парламенті Сенатының депутаты
                                 (келісім бойынша)

Оразаев                        - Қазақстан Республикасының Ауыл
Марат Әбілахатұлы                шаруашылығы вице-министрі

Қуанғанов                      - Қазақстан Республикасының Білім
Фархад Шаймұратұлы               және ғылым министрлігінің жауапты
                                 хатшысы

Құсайынов                      - Қазақстан Республикасының
Марат Әпсеметұлы                 Экономика және бюджеттік
                                 жоспарлау вице-министрі

Тұрғанов                       - Қазақстан Республикасының
Дүйсембай Нұрбайұлы              Энергетика және минералдық
                                 ресурстар вице-министрі

Үкібаев                        - Қазақстан Республикасы
Ермек Елеуханұлы                 Республикалық ұланы
                                 Қолбасшысының бірінші
                                 орынбасары (келісім бойынша)

Шаяхметов                      - Қазақстан Республикасы Ұлттық
Әділ Шаяхметұлы                  қауіпсіздік комитеті
                                 төрағасының бірінші орынбасары
                                 (келісім бойынша)

Дәненов                        - Қазақстан Республикасы Сыртқы
Нұрлан Жұмағалиұлы               істер министрінің орынбасары

Ойнаров                        - Қазақстан Республикасы Қорғаныс
Азамат Рысқұлұлы                 министрінің орынбасары

Мейірманова                    - Қазақстан Республикасы Парламентінің
Азалия Амангелдіқызы             Мәжілісіндегі "Нұр Отан"
                                 халықтық-демократиялық партиясы
                                 фракциясының аппараты
                                 ұйымдастыру-құқық бөлімінің
                                 меңгерушісі (келісім бойынша)

Қуанғанова                     - Қазақстан кәсіпкерлері форумы
Гүлнәр Шаймұратқызы              атқарушы директорының орынбасары
                                 (келісім бойынша)

Парсегов                       - Қазақстан Республикасы
Борис Анатольевич                Бәсекелестікті қорғау агенттігі
                                 төрағасының орынбасары

Меңдібаев                      - Қазақстан Республикасының Статистика
Бірлік Қайырбекұлы               агенттігі төрайымының орынбасары

Нұғманова                      - "Қазақстан Республикасының заң
Эльмира Әбдікқызы                шығару институты" жауапкершілігі
                                 шектеулі серіктестігінің директоры,
                                 заң ғылымдарының кандидаты (келісім
                                 бойынша)

Сәдуақасова                    - Қазақстан Республикасының Қоршаған
Елдана Мәкенқызы                 ортаны қорғау вице-министрі

Нұрымбетов                     - Қазақстан Республикасының Еңбек және
Біржан Бидайбекұлы               халықты әлеуметтік қорғау
                                 вице-министрі

Саванков                       - Қазақстан Республикасының Ішкі істер
Александр Михайлович             вице-министрі

Дәулеталин                     - Қазақстан Республикасының Парламенті
Сатыбалды Телағысұлы             Мәжілісінің Аппарат Басшысының
                                 орынбасары (келісім бойынша)

Байжанов                       - Қазақстан Республикасы "Сырбар"
Ғабит Жақыпбайұлы                сыртқы барлау қызметі директорының
                                 бірінші орынбасары (келісім бойынша)

      Ескерту. 1-тармаққа өзгерту енгізілді - ҚР Үкіметінің
2001.04.02 N 430 , 2001.09.27 N 1256 , 2002.02.20 N 231 , 2002.04.03
N 397 , 2003.06.10 N 547 , 2002.04.03 N 397 , 2003.08.12 N 802 ,
2003.11.25 N 1175 , 2004.04.08 N 389 , 2004.11.23 N 1227 , 2004.12.21
N 1352 , 2005.04.28 N 398 , 2005.05.23 N 493 , 2005.09.22 N 941 ,
2005.12.30 N 1327 , 2006.03.15 N 172 , 2006.09.07 N 846 , 2007.03.20
N 217 , 2007.10.05 N 905 , 2008.04.07 N 323 , 2008.06.16 N 587 ,
2008.12.24 N 1248 , 2009.05.15. N 728 Қаулыларымен.

      2. Қоса берiлiп отырған:
      1) Заң жобалау қызметi мәселелерi жөнiндегi ведомствоаралық комиссия туралы ереже;
      2) алынып тасталды
      Ескерту. 2)-тармақша алынып тасталды - ҚР Үкіметінің 2003.08.21. N 840 қаулысымен .

      3. Ағымдағы және перспективадағы заң жобалау жұмыстары жобаларының орындалуына жалпы бақылау Қазақстан Республикасының Әдiлет министрлiгiне жүктелсiн.

      4. Уәкiлеттi мемлекеттiк органдар әр айдың 25-шi күнiнен кешiктiрмей Қазақстан Республикасының Әдiлет министрлiгiне шұғыл және басым заң жобаларын, сондай-ақ Мемлекет басшысының тапсырмаларынан туындайтын заң жобаларын дайындау, заң жобаларының Қазақстан Республикасының Yкiметi мен Парламентiнде өтуi туралы ақпаратты, сондай-ақ заң жобалау жұмыстарының орындалу барысы туралы есептi ұсынсын.
      Ескерту. 4-тармаққа өзгерту енгізілді - ҚР Үкіметінің   2006.03.15. N 172 қаулысымен.

      5. Қазақстан Республикасының Әдiлет министрлiгi:
      Қазақстан Республикасының Yкiметi мен уәкілеттi мемлекеттiк органдардың заң жобалау қызметiнiң барысын ай сайын қорытсын, шұғыл және басым заң жобаларын, сондай-ақ Мемлекет басшысының тапсырмаларынан туындайтын заң жобаларын дайындау туралы ақпаратты, сондай-ақ заң жобалау жұмыстары жоспарларының орындалу барысы туралы ақпаратты дайындасын және есептi айдан кейiнгi айдың бiрi күнiне қарай Қазақстан Республикасының Үкiметiне жiберсiн;
      уәкiлеттi мемлекеттiк органдардың заң жобаларын әзiрлеу мерзiмдерiн бұзушылықтары туралы Қазақстан Республикасының Үкiметiне жедел хабарласын және анықталған тәртiп бұзушылықтарды жою жөнiндегі шараларды ұсынсын.
      Ескерту. 5-тармаққа өзгерту енгізілді - ҚР Үкіметінің   2006.03.15. N 172 қаулысымен.

      6. Уәкiлеттi мемлекеттiк органдар Yкiметтiң Парламентке енгізген заң жобаларының мәтiндерiне заңның тұжырымдамасымен, оның құқықтық мазмұнын өзгертумен байланысты және мемлекеттiк кiрiстердi азайтуды немесе мемлекеттiк шығыстарды ұлғайтуды көздейтiн өзгерiстер мен толықтыруларды Yкiметпен келiспей енгiзудi болдырмау мақсатында Қазақстан Республикасының Yкiметi Регламентiнiң 79-тармағының талаптарын қатаң орындауды қамтамасыз етсiн.
      Ескерту. 6-тармаққа өзгерту енгізілді - ҚР Үкіметінің 2002.12.10. N 1300 , 2007.03.20. N 217 қаулыларымен.

      7. Қазақстан Республикасы Yкiметiнің Парламенттегi Өкiлдiгi Премьер-Министрдi, оның орынбасарлары мен Премьер-Министр Кеңсесiнің Басшысын Қазақстан Республикасының Үкiметi енгiзетiн заң жобаларының және Қазақстан Республикасы Үкiметiнiң қызметiне қатысы бар Қазақстан Республикасының Парламентi қарайтын басқа да мәселелердің өту процесi туралы тұрақты хабардар етсiн.

      8. Осы қаулы қол қойылған күнінен бастап күшiне енедi.

      Қазақстан Республикасының
      Премьер-Министрі

Қазақстан Республикасы Үкiметiнiң 
2000 жылғы 11 қыркүйектегі   
N 1376 қаулысымен       
бекiтiлген       

Заң жобалау қызметi мәселелерi жөнiндегi ведомствоаралық комиссия туралы
ЕРЕЖЕ

1. Жалпы ережелер

      1. Заң жобалау қызметi мәселелерi жөнiндегi ведомствоаралық комиссия (бұдан әрi - Комиссия) Қазақстан Республикасының Yкiметi жанындағы консультативтiк-кеңесшi орган болып табылады.

      2. Комиссия қызметiнiң басты мақсаты Республиканың қолданыстағы заңнамасын, сондай-ақ Қазақстан Республикасы Үкiметiнiң және уәкiлеттi мемлекеттiк органдарының заң жобалау қызметiн жетiлдiру жөнiндегi ұсыныстарды жасаудан тұрады.
      Ескерту. 2-тармаққа өзгерту енгізілді - ҚР Үкіметінің 2002.06.24. N 690 қаулысымен .

      3. Комиссия өз қызметiнде Қазақстан Республикасының Конституциясын, "Нормативтiк құқықтық актiлер туралы" Қазақстан Республикасының Заңын, өзге де нормативтiк құқықтық кесiмдердi, сондай-ақ осы Ереженi басшылыққа алады.

2. Комиссияның мiндеттерi

      4. Комиссияның негiзгi мiндеттерi:
      Қазақстан Республикасы Yкiметiнiң және уәкiлеттi мемлекеттiк органдарының заң жобалау қызметiн талдау;
      Үкiметтiң Іс-қимыл бағдарламасын, Мемлекет басшысының тапсырмаларын, сондай-ақ елде жүргiзiлiп жатқан реформаларды ескере отырып, Қазақстан Республикасы Үкiметiнiң ағымдағы және перспективалық заң жобалау жұмыстарының жоспарын қалыптастыру жөнiндегi ұсынымдарды әзiрлеу;
      заң жобалау қызметiнiң басым бағыттары туралы ұсыныстарды Қазақстан Республикасы Үкiметiнiң қарауына енгiзу;
      Қазақстан Республикасының Үкiметi мен Парламентiнде заң жобаларының әзiрленуi және жүруi процесiнде туындайтын келiспеушiлiктердi реттеу жөнiндегi ұсыныстарды әзiрлеу;
      мемлекеттік органның өтініші бойынша мерзімдерді ауыстыру және тиісті жылға арналған Заң жобалау жұмыстарының жоспарына өзгерістер мен толықтырулар енгізу туралы мәселелерді қарау;
      Үкіметтің Парламент Мәжілісінен заң жобаларын қайтарып алу мәселелері бойынша ұсынымдарды алдын-ала әзірлеу;
      Парламент депутаттары бастамашылық еткен заң жобалары Үкіметке түскен күнінен бастап 15 күндiк мерзімде оларды он не өзге бағалау жөнінде ұсыныстар әзірлеу мақсатымен қарау; <*>
      Үкіметтің мемлекеттік және өзге де бағдарламаларының, тұжырымдамаларының, іс-шараларының жобалары нормаларын заң жобалаумен қамтамасыз ету бөлігінде келісу;
      әзірлеушілер дайындаған заң жобаларын жобалар сараптамасын орындау мақсатында Үкіметке берудің ағымдағы жедел мерзімдерін айқындау;
      заң кесімдерімен реттеліп қойған қатынастар бойынша заң жобаларының тұжырымдамаларын және заң жобаларын әзірлеу туралы ұсыныстарды алдын ала қарау; 
      заң жобаларын ғылыми, криминологиялық және өзге де сараптамаға жіберу туралы, сондай-ақ заң жобаларының тұжырымдамаларын ғылыми құқықтық сараптамаға жiберу туралы ұсынымдар әзірлеу.
      Қазақстан Республикасының қолданыстағы заңнамасын талдау және оны жүйелеу жөнiнде ұсынымдар әзiрлеу;
      заңнаманы кодтау жөнiндегi жұмыстың басым бағыттарын айқындау жөнiндегi ұсыныстарды белгiленген тәртiппен Қазақстан Республикасы Yкiметiнiң қарауына енгiзу;
      кодталған және топтастырылған кесiмдердiң жобаларын әзiрлеу жөнiнде ұсыныстар енгiзу.
      Ескерту. 4-тармаққа өзгерту енгізілді - ҚР Үкіметінің 2001.09.27. N 1256 , 2002.06.24. N 690 , 2002.12.10. N 1300 , 2003.08.21. N 840 , 2007.03.20. N 217 қаулыларымен.

3. Комиссияның негiзгi құқықтары

      5. Комиссияның өз мiндеттерiне сәйкес:
      1) орталық атқарушы және басқа да мемлекеттiк органдармен және ұйымдармен өзара iс-әрекет жасауға;
      2) өз құзыретiне кiретiн мәселелер бойынша ұсынымдар жасауға және ұсыныстар енгiзуге;
      3) заңнамада белгiленген тәртiппен Комиссияның мiндеттерiн iске асыру үшiн қажеттi материалдарды мемлекеттiк және басқа да ұйымдардан сұратуға және алуға;
      4) Комиссияның мiндеттерiн iске асыруға байланысты мәселелер бойынша мемлекеттiк органдар және ұйымдардың өкiлдерiн Комиссияның отырыстарына шақыруға және тыңдауға;
      5) уақытша және тұрақты жұмыс iстейтiн сарапшылық және жұмыс топтарын ұйымдастыруға құқылы.

4. Комиссияның қызметiн ұйымдастыру

      6. Комиссияның төрағасы оның қызметiне басшылық етедi, отырыстарына төрағалық етедi, жұмысын жоспарлайды, шешiмдерінің iске асырылуына жалпы бақылауды жүзеге асырады. Төраға болмаған уақытта оның функциясын орынбасары орындайды.
      Ескерту. 6-тармақ жаңа редакцияда - ҚР Үкіметінің   2006.03.15. N 172 қаулысымен.

      7. Комиссияның жұмысын ұйымдастыруды, тиiстi материалдарды, ұсынымдарын әзiрлеудi оның мүшелерi сайлайтын Комиссияның хатшысы жүзеге асырады.

      8. Комиссия хатшысы:
      1) Комиссия отырысының күн тәртiбi бойынша ұсыныстар әзiрлейдi, Комиссия шешiмдерiнiң орындалуын қамтамасыз етедi және бақылайды;
      2) Комиссия мүшелерiнiң және оның қызметiне тартылған мамандардың жұмысын үйлестiредi.

      9. Комиссияның отырыстары күнтiзбелiк жылғы айдың бiрiншi және үшiншi дүйсенбiсiнде, қажет болған кезде, Комиссияның төрағасы белгілейтiн өзге де күндерде де өткiзiледі.
      Ескерту. 9-тармақ жаңа редакцияда - ҚР Үкіметінің   2006.03.15. N 172 қаулысымен.

      10. Отырыстың күн тәртiбiн, сондай-ақ оның өткiзiлетiн орны мен уақытын Комиссияның Төрағасы Комиссия мүшелерiнiң келiсiмi бойынша анықтайды және нақтылайды.

      11. Комиссияның шешiмi оның мүшелерiнiң көпшiлiк даусымен қабылданады, Комиссияға төрағалық етушi мен оның хатшысы қол қоятын хаттамамен ресiмделедi және ұсынымдық сипатта болады.
      Ескерту. 11-тармаққа өзгерту енгізілді - ҚР Үкіметінің   2006.03.15. N 172 қаулысымен.

      12. Комиссияның мүшелерi шешiм қабылдау кезiнде тең дауыстарға ие болады. Дауыстар тең түскен жағдайда төрағалық етушi дауыс берген шешiм қабылданған болып саналады.
      Ескерту. 12-тармаққа өзгерту енгізілді - ҚР Үкіметінің   2006.03.15. N 172 қаулысымен.

      13. Заң жобалау қызметiн жетiлдiру мәселелерi жөнiндегi ұсыныстарды Комиссияның атынан Комиссия құрамының кемiнде жартысының ауызша немесе жазбаша келiсiмi бойынша Комиссияның Төрағасы немесе хатшысы Қазақстан Республикасы Yкiметiнiң қарауына енгiзедi.

      14. Комиссияның құзыретiне қатысты қажетті материалдарды әзiрлеу үшiн ұйымдар, жоғары оқу орындары, сондай-ақ ғалымдар және жоғары бiлiктi мамандар тартылуы мүмкiн.

      15. Қазақстан Республикасының Әдiлет министрлiгi Комиссияның жұмысшы органы болып табылады.

      16. Комиссияның отырысы, егер оған Комиссия мүшелерiнiң жалпы санының кемiнде жартысы қатысса, заңды деп саналады. Комиссия мүшелерiнiң отырысқа қатысу жөнiндегi өз өкiлеттіктерiн басқа адамдарға беруге құқығы жоқ.
      Ескерту. 16-тармақпен толықтырылды - ҚР Үкіметінің   2006.03.15. N 172 қаулысымен.

Қазақстан Республикасы Үкiметiнiң 
2000 жылғы 11 қыркүйектегі    
N 1376 қаулысымен        
бекiтiлген        

Қазақстан Республикасының уәкiлетті органдарында заң жобалау жұмысын ұйымдастыру ережесi

      1. "Нормативтiк құқықтық актiлер туралы" Қазақстан Республикасының Заңына және Қазақстан Республикасы Үкiметiнiң Регламентiне сәйкес осы Ереже заң жобаларын әзiрлеушi - уәкiлеттi органдарда (бұдан әрi - Уәкiлеттi органдар) заң жобалау жұмысын ұйымдастыру тәртiбiн белгiлейдi.

      2. Уәкiлеттi органдар заң жобаларын, әдетте, Қазақстан Республикасының Yкiметі заң жобалау жұмыстарының ағымдағы және перспективалық жоспарларына, сондай-ақ Мемлекет басшысы мен Қазақстан Республикасы Үкiметiнiң жекелеген тапсырмаларына сәйкес әзiрлейдi.
      Қажеттi жағдайларда заң жобаларын әзiрлеудi Уәкiлеттi органдар өз бастамасы бойынша - олардың белгiленген құзыретiне сәйкес жүзеге асырады.

      3. Заң жобасын әзiрлейтiн уәкiлеттi орган жобаны әзiрлеу жөнiнде жұмыс тобын құрады немесе оны әзiрлеудi жұмыс тобының функцияларын орындайтын өзiнiң бiр бөлiмшесiне тапсырады. Жобаны әзiрлеуге жобаны әзiрлейтiн органның заңгерлiк бөлiмшесi қызметкерлерiнiң қатысуы мiндеттi.
      Жұмыс тобына қатысу үшiн Қазақстан Республикасы Парламентiнiң депутаттары, сондай-ақ реттеуге ұсынылатын құқықтық қатынастар саласындағы мамандар мен ғалымдар шақырылуы мүмкiн.

      4. Егер заң жобалау жұмыстарының жоспарымен немесе заң жобасын әзiрлеу туралы тапсырмамен өзгеше белгiленбесе, Уәкiлеттi орган заң жобасын әзiрлеудi ведомстволық бағыныстағы мемлекеттiк ұйымдарға немесе шарттық негiзде мамандарға, ғылыми мекемелерге, жекелеген ғалымдарға немесе олардың ұжымдарына, оның iшiнде шетелдiктерге тапсыра алады.
      Уәкiлеттi орган балама жобаларды әзiрлеудi бiр немесе бiрнеше тұлғаға тапсыруға құқылы.
      Заң жобаларының сапасы, уақытылы әзiрленуi мен ұсынылуы үшiн Уәкiлеттi органдардың бiрiншi басшылары жеке жауап бередi.

      5. Уәкiлеттi органдардың заң жобалау жұмыстарының жоспарларын және заң жобаларын әзiрлеу жөнiндегi жекелеген тапсырмаларды орындауын жалпы қадағалауды, олардың осы бағыттағы қызметiн әдiстемелiк басқаруды және сол үшiн қажеттi ақпараттық қамтамасыз етудi Қазақстан Республикасының Әдiлет министрлiгi жүзеге асырады.

      6. Заң жобасының мәтiнi әдеби тiлдiң, заң терминдерiнiң нормаларын, заң техникасының талаптарын және заңнамамен белгiленген өзге де талаптарды сақтай отырып әзiрленуге тиiс.

      7. Заң жобасын әзiрлеу тиiстi салалар мен қоғамдық өмiр салаларында Қазақстан Республикасының заңнамасын қолдану практикасы, Мемлекет басшысының Қазақстанның халқына Жолдауы, Конституциялық Кеңестiң жыл сайынғы жолдауының ережелерi мен Жоғарғы Соттың сот практикасы түсiндiрмелерi ескерiле отырып, жүзеге асырылады.

      8. Үкiмет Парламенттiң қарауына енгiзетін заң жобалары бойынша "Норма шығармашылығы қызметiн жетiлдiру жөнiндегi шаралар туралы" Үкiметтiң 2002 жылғы 30 мамырдағы N 598 қаулысымен бекiтiлген Заң жобаларына ғылыми сараптама жүргiзу ережесiне сәйкес заң жобасында реттелетiн құқықтық қатынастарға қарай тиiстi ғылыми сараптама (құқықтық, экономикалық, экологиялық, қаржылық және басқа) жүргiзу мiндеттi. Бұл ретте қабылдануынан туындайтын болжамды салдарлар экологиялық, соның iшiнде радиациялық қауiпсiздiкке, қоршаған ортаны қорғауға қауiп төндiруi мүмкiн заңнамалық кесiмдердiң жобалары мiндеттi түрде экологиялық сараптама жасауға жатады. Заң жобасын әзiрлеушi оны мүдделi мемлекеттiк органдармен келiскенге дейiн жобаның тиiстi сараптамасы жүргiзiлуiн қамтамасыз етедi, оның нәтижелерi бойынша қорытынды заң жобасына басқа да материалдармен бiрге мемлекеттiк және орыс тілдерiнде ұсынылады. <*>
      Ескерту. 8-тармақ жаңа редакцияда - ҚР Үкіметінің 2002.12.10. N 1300 қаулысымен.

      9. алынып тасталды

      10. алынып тасталды
      Ескерту. 9-10-тармақтар алынып тасталды - ҚР Үкіметінің 2002.12.10. N 1300 қаулысымен.

      11. Заң жобасын мемлекеттiк органдармен келiсу Қазақстан Республикасы Үкiметiнiң Регламентiнде белгiленген тәртiппен және мерзiмдерде жүзеге асырылады. 
      Ескерту. 11-тармаққа өзгерту енгізілді - ҚР Үкіметінің 2001.04.02. N 430 қаулысымен .

      12. Егер заң жобасын келiсу кезiнде келiсiм берушi мемлекеттiк орган Уәкiлеттi орган келiспейтiн ескертпелер жасаса, заң жобасы жөнiндегi келiспеушiлiктер хаттамасын Қазақстан Республикасы Yкiметiнiң жанындағы Заң жобалау қызметi мәселелерi жөнiндегі ведомствоаралық комиссия қарайды.
      Қазақстан Республикасының Үкiметi түпкiлiктi шешiмдi Ведомствоаралық комиссия дайындаған ұсыным кезiнде шығарады.

      13. Заң жобасын Yкiметтiң қарауына енгiзу тәртiбiн Қазақстан Республикасы Үкiметiнiң Регламентi белгiлейдi.