1. Мыналар:
1) Қазақстан Республикасы Мемлекеттiк тергеу комитетiнде және оның органдарында қызмет өткеру туралы Ереже (қоса берiлiп отыр);
2) Қазақстан Республикасы Мемлекеттiк тергеу комитетiнiң және оның органдарының қызметкерлерi қабылдайтын Ант мәтiнi (қоса берiлiп отыр) бекiтiлсiн.
2. Қазақстан Республикасының Үкiметi осы Жарлық күшiне енген күннен бастап бiр ай мерзiмде "Қазақстан Республикасының Мемлекеттiк тергеу комитетi және оның органдары туралы" Қазақстан Республикасы Президентiнiң 1995 жылғы 21 желтоқсандағы N 2706 Заң күшi бар Жарлығының 24-бабының 7-тармағына сәйкес Қазақстан Республикасының Мемлекеттiк тергеу комитетi мен оның органдарының қызметкерлерi мен
зейнеткерлерiне Қазақстан Республикасы Қорғаныс министрлiгiнiң
әскери қызметшiлерi мен зейнеткерлерi үшiн белгiленген жеңiлдiктер
мен артықшылықтарды қолдану туралы қаулы шығаратын болсын.
Осы Жарлық қол қойылған күнiнен бастап күшiне енедi.
Қазақстан Республикасының
Президентi
Қазақстан Республикасы
Президентiнiң
1966 жылғы 14 маусымдағы
N 3035 Жарлығымен
бекiтiлген
Қазақстан Республикасының Мемлекеттiк тергеу комитетi
мен оның органдарында қызмет өткеру туралы
Ереже
Осы Ереже Қазақстан Республикасының Мемлекеттiк тергеу комитетi
мен оның органдары қызметкерлерiнiң қызмет өткеру тәртiбi мен
шарттарын реттейдi.
1 Тарау
Жалпы Ережелер
1-бап. Қазақстан Республикасының Мемлекеттiк тергеу
комитетi мен оның органдарының қызметкерлерi
1. Қазақстан Республикасының Мемлекеттiк тергеу комитетi мен оның органдарының (бұдан былай - МТК) қатардағы және басшы құрамының лауазымдарында немесе МТК-нiң қатардағы және басшы құрамының осы Ережемен белгiленген тәртiпке сәйкес арнаулы атақтар берiлген МТК кадрларында тұратын, сондай-ақ құқықтық жағдайы заңмен айқындалатын МТК-нiң әскери-тергеу органдарындағы әскери қызметшiлерi - Қазақстан Республикасының азаматтары - Қазақстан Республикасы Мемлекеттiк тергеу комитетiнiң және оның органдарының қызметкерлерi (бұдан былай - МТК қызметкерлерi) болып табылады.
2. МТК қызметкерлерi тиiстi дайындықтан өткеннен кейiн заңмен
айқындалған тәртiп бойынша қару мен арнаулы құралдарды алып жүруге,
сақтауға және қолдануға хақылы.
2-бап. МТК-де қызмет өткеру принциптерi
1. МТК-де қызмет өткеру тегiне, әлеуметтiк, лауазымдық және
мүлiктiк жағдайына, жынысына, нәсiлiне, ұлтына, тiлiне, дiнге
көзқарасына, наным-сенiмiне немесе кез келген өзге жағдайларға
қарамастан заңдылық, қорғалу құқығы қамтамасыз ету, заң алдындағы
теңдiк принциптерiне сәйкес құрылады.
2. МТК-де қызмет өткеру дара басшылық негiзiнде құрылады.
3. МТК қызметкерлерiнiң iс жүргiзу жөнiндегi жағдай заңмен
белгiленедi.
3-бап. МТК-де қызмет өткерудiң құқықтық негiзi
1. МТК-де қызмет өткерудiң құқықтық негiзiн Қазақстан Республикасының Конституциясы, "Қазақстан Республикасының Мемлекеттiк тергеу комитетi және оның органдары туралы" Қазақстан Республикасы Президентiнiң Заң күшi бар Жарлығы, осы Ереже және басқа да Қазақстан Республикасының нормативтiк құқықтық актiлерi құрайды.
2. МТК-нiң әскери-тергеу органдары әскери қызметшiлерiнiң мерзiмдi әскери қызмет өткеруi Қазақстан Республикасының Қарулы Күштерiнде қызмет өткеру шарттарын белгiлейтiн нормативтiк құқықтық актiлермен және МТК Төрағасы бекiтетiн Қазақстан Республикасы Мемлекеттiк тергеу комитетiнiң әскери-тергеу органдарында қызмет өткеру туралы Ережемен реттеледi.
4-бап. МТК қызметкерiнiң қызметтiк мiндеттерi
мен құқықтары
1. МТК-нiң қызметкерi:
1) заңға, Антқа, осы Ереже мен контрактқа сәйкес атқаратын лауазымына қарай өз құзыретiнiң шегiнде мiндеттер орындайды және құқықтарды пайдаланады;
2) мемлекеттiң қорғауында болады. Заңмен тiкелей уәкiлдiк берiлген органдар мен лауазымды адамдардан басқа ешкiмнiң оның қызметiне араласуға хақы жоқ. Заңға көрiнеу қайшы келетiн бұйрық немесе нұсқау алған жағдайда МТК-нiң қызметкерi заңды орындау үшiн шаралар қолдануға мiндеттi;
3) өзiнiң қызметтiк iс-әрекетiнде заң талаптарын басшылыққа алады және саяси партиялардың, өзге қоғамдық бiрлестiктердiң шешiмдерiмен шектелуге тиiс емес.
2. Қызметтiк мiндеттерiн атқарған кездегi құқыққа қарсы iс-әрекетi немесе әрекетсiздiгi, қызметтiк мiндеттерiн тиiсiнше атқармағаны үшiн МТК қызметкерi заңға сәйкес жауапқа тартылады.
3. МТК қызметкерiнiң құқыққа қарсы iс-әрекетiмен немесе әрекетсiздiгiмен жеке және заңды тұлғаларға келтiрiлген зиян, заңда да көзделген тәртiппен өтелуге тиiс.
5-бап. Қатардағы және басшы құрамның лауазымдары
1. Қатардағы, кiшi, орта және аға басшы құрамның лауазымдар тiзбесiн және осы лауазымдарға сәйкес келетiн арнаулы атақтарды МТК Төрағасы бекiтедi.
2. Жоғары басшы құрамның лауазымдар тiзбесiн және осы лауазымдарға сәйкес келетiн арнаулы атақтарды Қазақстан Республикасының Президентi бекiтедi.
6-бап. Арнаулы атақтар
1. "Қазақстан Республикасы Мемлекеттiк тергеу комитетiнiң қатардағы және басшы құрамының арнаулы атақтары туралы" Қазақстан Республикасы Президентiнiң 1995 жылғы 23 желтоқсандағы Заң күшi бар N 2719 Жарлығына сәйкес МТК-нiң қатардағы және басшы құрамына лауазымға тағайындалған Қазақстан Республикасының азаматтарына
мынадай арнаулы атақтар берiледi:
1) қатардағы құрам:
қатардағы әдiлет қызметкерi;
2) кiшi басшы құрам:
әдiлет кiшi сержанты, әдiлет сержанты, әдiлет аға сержанты,
әдiлет старшинасы, әдiлет прапорщигi, әдiлет аға прапорщигi;
3) орта басшы құрам:
әдiлет кiшi лейтенанты, әдiлет лейтенанты, әдiлет аға
лейтенанты, әдiлет капитаны;
4) аға басшы құрам:
әдiлет майоры, әдiлет подполковнигi, әдiлет полковнигi;
5) жоғары басшы құрам:
әдiлет генерал-майоры, әдiлет генерал-лейтенанты, әдiлет
генерал-полковнигi.
2. Қатардағы әдiлет қызметкерiнен әдiлет старшинасына дейiнгi арнаулы атақтар МТК оқу орындарының күндiзгi бөлiмiнiң курсанттары мен тыңдаушыларына берiледi.
3. МТК басшы құрамының атақтары өмiр бойын берiледi. Қызмет
тоқтатқан кезде арнаулы атағына "отставкадағы" сөзi қосылады.
7-бап. МТК қызметкерлерiнiң кәсiби даярлығы
1. МТК-нi бiлiктi мамандармен жасақтау мақсатында Қазақстан
Республикасының Мемлекеттiк тергеу комитетi МТК қызметкерлерiн
кәсiби даярлауды жүзеге асырады. Бұған бастапқы арнайы оқыту, дене
күшiн, арнайы құралдарды және атыс қаруын қолданумен байланысты
жағдайларда iс-қимылға жарамдылығын мезгiл-мезгiл тексеру, оқу
орындарында мамандар даярлау, бiлiктiлiгiн арттыру мен қайта даярлау
кiредi.
2. Кәсiби даярлықтың ұйымдастырылуы мен оның мазмұнын МТК
Төрағасы айқындайды.
II Тарау
МТК ҚЫЗМЕТКЕРЛЕРIН ҚЫЗМЕТКЕ ҚАБЫЛДАУ
ЖӘНЕ ҚЫЗМЕТ ЖӨНIНЕН АУЫСТЫРУ
8-бап. МТК-ге қызметке қабылдау шарттары
1. МТК-ге қызметке өзiнiң моральдық және кәсiби қасиеттерi, бiлiмi мен денсаулық жағдайына қарай өздерiне жүктелген мiндеттердi орындауға қабiлеттi жасы он сегiзден кем емес Қазақстан Республикасының азаматтары ерiктi негiзде қабылданады.
МТК жүйесiнiң оқу орындарына оқуға бiлiмi бар, он сегiз жасқа толмаған адамдар қабылдана алады.
2. МТК-дегi қызметке кiру мемлекеттiк қызметшiлер кадрлары туралы республикалық деректер орталығына алдын-ала сұрау салынған және азаматтар мiндеттi арнаулы тексеруден өткiзiлген жағдайда, сондай-ақ әскери-дәрiгерлiк комиссияларда қызметке жарамдылығын айқындау үшiн медициналық куәландыру арқылы жүзеге асырылады.
3. Қатардағы және кiшi басшы құрамның лауазымдарына 32 жастан аспаған адамдар, орта және аға басшы құрамның лауазымдарына 40 жастан аспаған адамдар қабылданады. Ерекше жағдайларда аталған жас шегi МТК Төрағасының шешiмiмен өзгертiледi.
4. МТК қатардағы және кiшi басшы құрамының лауазымдарына ортадан төмен емес бiлiмi бар азаматтар қабылданады.
5. Орта және аға басшы құрамның лауазымдарына тиiсiнше арнаулы орта немесе жоғары бiлiмi бар азаматтар қабылданады.
6. Ерекшелiк ретiнде жедел қызмет бөлiмшелерiнiң орта басшы құрамының лауазымдарына азаматтар жалпы орта бiлiмiмен, ал аға басшы құрамының лауазымдарына - даярлау бейiмi бойынша салаға жақын орта арнаулы бiлiмiмен, егер олар жұмыс тәжiрибесi мен iскерлiк қабiлетi жағынан өздерiне жүктелген мiндеттердi атқара алса және жоғары немесе арнаулы орта оқу орындарында оқитын болса ғана қабылдануы мүмкiн.
7. Бұрын МТК-нен, оның органдарынан босатылған және қызметке қайта қабылданған азаматтар үшiн жастық шектеулер осы Ереженiң 52-бабының талаптарына сәйкес айқындалады.
8. МТК қатардағы және басшы құрамы лауазымдарына орналасу заңға сәйкес, қызметке тағайындау арқылы, сондай-ақ жеке контракт жасасу арқылы, конкурспен жүзеге асырылады.
9. МТК-нiң қызметкерлерiн қызметке қабылдау МТК-нiң Төрағасы айқындайтын құзырет бойынша тиiстi МТК органы бастығының бұйрығымен ресiмделедi. Бұйрық МТК-нiң қызметкерiне қолхат алу арқылы жария етiледi.
9-бап. МТК-не қызметке қабылдау мен оны
өткерудегi шектеулер
1. Бұрын сотталған және ақталмайтын негiздер бойынша қылмыстық жауапкершiлiктен босатылған, сондай-ақ мемлекеттiк қызметтен, өзге құқық қорғау органдарынан, соттар мен әдiлет органдарынан жарамсыз себептер бойынша шығарылған адамдар МТК-не қызметке қабылданбайды.
2. Өзара жақын туыстығы немесе жекжаттығы бар (ата-аналар, ерлi-зайыптылар аға-iнiлер, апа-сiңлiлер, ұлдары, қыздары, сондай-ақ ерлi-зайыптылардың аға-iнiлерi, апа-сiңлiлерi, ата-аналары мен балалары) МТК-нiң қызметкерлерiнiң, егер олардың қызметi бiрiнiң екiншiсiне бағыныстылығымен немесе бақылауында болуына байланысты болса, бiр МТК органында бiрге қызмет атқаруына рұқсат етiлмейдi.
10-бап. МТК-дегi қызмет өткерумен байланысты
шектеулер
МТК қызметкерiнiң лауазымы оқытушылық, ғылыми немесе өзге де шығармашылық қызметтен басқа, депутаттық мандатпен, өзге де ақы төленетiн қызметтi атқарумен, кәсiпкерлiк қызметтi жүзеге асырумен, коммерциялық ұйымның басшы органының немесе байқаушы кеңесiнiң құрамына кiрумен сыйыспайды.
11-бап. Қоса атқару
МТК қызметкерлерiне уақытша орнында болмаған қатардағы және басшы құрамдағы адамдардың мамандықтарын (лауазымдарын) қоса атқаруға немесе мiндеттерiн орындауға МТК Төрағасы белгiлеген тәртiп пен шарттарда рұқсат етiледi.
12-бап. МТК-де қызмет өткеру туралы контракт
1. МТК-де қызмет өткеру туралы контракт жасасу тәртiбi мен шарттарын МТК Төрағасы айқындайды.
2. Контракта оның қолданылу мерзiмi, тараптардың мiндеттемелерi, тараптардың өздерiне алған мiндеттемелерiн орындамауына байланысты туындайтын заңдық салдарлар, оны ұзарту немесе қайта жасасу шарттары және контракттың басқа да жағдайлары көзделедi.
13-бап. Сынақ мерзiмi
1. МТК-не қызметке тұңғыш рет кiретiн адамдар үшiн олардың даярлық деңгейiне және қабылданатын лауазымына қарай ұзақтығы үш айға дейiнгi сынақ мерзiмi белгiленуi мүмкiн. Бұл жағдайда кандидат арнаулы атақ берiлмей тиiстi лауазымға тағайындалады.
2. Сынақ мерзiмi уақытында кандидат атқаратын лауазымына және контракт шарттарына сәйкес МТК қызметкерлерiнiң мiндеттерiн орындайды және олардың құқықтарына ие болады.
3. Сынақ мерзiмi кезiнде кандидатқа еңбек туралы заңдардың, сондай-ақ осы Ереженiң 49-бабының күшi қолданылады.
4. Сынақ мерзiмi еңбек сiңiрген жылдары үшiн проценттiк үстемеақы төлеу және МТК-нiң саласы бойынша зейнетақы тағайындау құқығын беретiн МТК-дегi қызмет стажына есептеледi.
5. Жоғары басшы құрамның лауазымдарына тағайындалатын адамдарға, МТК-не қызметке бөлiнiс бойынша кiретiн жоғары және орта арнаулы оқу орнының түлектерiне, сондай-ақ конкурс бойынша лауазымға тағайындалған ретте сынақ мерзiмi белгiленбейдi.
14-бап. МТК-дегi лауазымдарға конкурспен орналасу
МТК-дегi конкурстық негiзде атқарылатын лауазымдар тiзбесiн, лауазымға тағайындау тәртiбi мен шарттарын заңға сәйкес МКТ Төрағасы белгiлейдi.
15-бап. МТК-не лауазымға тағайындау
1. МТК Төрағасы, оның орынбасарлары, МТК органдарының бастықтары, ал сондай-ақ заң актiлерiнде, Қазақстан Республикасы Президентiнiң актiлерiнде көзделген жағдайларда МТК органдарының өзге де лауазымды адамдары заңға сәйкес лауазымдарға тағайындалады.
2. Қажеттi жағдайларда МТК Төрағасының шешiмiмен МТК аға және жоғары басшы құрамның лауазымдарына бұрын МТК-нiң кадрларында тұрмаған, жасына қарамастан, бiрақ 50 жастан аспаған, мемлекеттiк органдардың мамандары, ғылыми қызметкерлер мен жоғары оқу орындарының оқытушылары арасынан азаматтар тағайындалуы мүмкiн. Бұл ретте оларға мамандығы бойынша бұрынғы жұмыс стажы, оның iшiнде аспирантурада, докторантурада оқыған уақыты қосылып, МТК-дегi қызмет стажына еңбек сiңiрген жылдары үшiн проценттiк үстемеақы мен
зейнетақы тағайындау үшiн қоса есептеледi. Бұл адамдарға тиiстi
арнаулы атақтар осы Ережеде көзделген тәртiппен берiледi.
16-бап. МТК қызметкерiнiң анты
МТК-дегi қызметке тұңғыш рет кiрген адамдар, мәтiнiн Қазақстан
Республикасының Президентi бекiтетiн ант қабылдайды. Ант беру
тәртiбiн МТК Төрағасы белгiлейдi.
17-бап. МТК қызметкерiн ауыстыру
1. МТК қызметкерiн қызмет бабында ауыстыру:
1) жоғары тұрған лауазымға - қызмет бабында жоғарылату ретiмен;
2) теңдес лауазымға - басқа лауазымды уақытша атқару қажет болған кезде не МТК қызметкерiн оның iскерлiк, жеке басының қасиеттерi мен жаңа мамандығы бойынша даярлығын ескере отырып, неғұрлым ұтымды пайдалану үшiн, сондай-ақ отбасы жағдайына, денсаулығына немесе жасына байланысты;
3) төменгi тұрған лауазымға - штаттар қысқарған ретте немесе органдар мен бөлiмшелердi қайта құруға байланысты, теңдес лауазымға ауыстыру мүмкiндiгi болмаған жағдайда, қызметкердiң келiсiмiмен;
4) денсаулығына байланысты - әскери-дәрiгерлiк комиссияның қорытындысына сәйкес;
5) өз өтiнiшi бойынша;
6) аттестациялау тәртiбiмен қызметке сай келмеуi бойынша;
7) тәртiптiк жаза ретiнде;
8) оқуға түскен кезде атқаратын штаттық лауазымынан босата отырып, сондай-ақ оқу аяқталған соң лауазымға тағайындау ретiмен жүргiзiледi.
2. МТК қызметкерi басқа лауазымға ауыстырылған ретте негiзгi немесе соған жақын мамандықтар бойынша не тәжiрибесiне сәйкес жұмыспен қамтамасыз етiледi, ал МТК қызметкерiн ол үшiн жаңа мамандық бойынша лауазымда пайдалану қажет болған жағдайда ауыстырудың алдында ол тиiстi курста (жиындарда) қайта даярлықтан өтуге тиiс.
3. МТК қызметкерiн қызмет бабымен ауыстыру барлық жағдайларда ауыстырудың негiздерi көрсетiлiп, МТК-нiң тиiстi органы бастығының бұйрығымен ресiмделедi. Бұйрық қызметкерге қолхат алына отырып жария етiледi.
4. МТК қызметкерлерi МТК-нiң оқу орындарына арнаулы пәндер бойынша басшылық және педагогикалық жұмысқа ауыстырылған жағдайда оларға оқу орнына тағайындалғанға дейiнгi соңғы негiзгi (уақытша атқарудан бөлек) лауазымдары бойынша лауазымдық жалақылары, егер бұл жалақылар бұрынғы жұмыс орнындағы алып жүргеннен төмен болса, кейiнгi арттырылуы ескерiле отырып сақталады (оның iшiнде жоғарлатылғаны да). Лауазымдық жалақының сақталуы туралы шешiмдi (оның iшiнде жоғарылатылғанын да) әрбiр нақты жағдайда МТК Төрағасы лауазымға тағайындағанға дейiн қабылдайды.
5. Штаттардың қысқаруы немесе денсаулығы бойынша төмен тұрған лауазымға лауазымдық жалақы мөлшерi кемiтiлiп ауыстырылған жағдайда 10 және одан да көп еңбек сiңiрген жылдары (күнтiзбелiк есептеумен) бар МТК қызметкерлерiне соңғы қызмет орны бойынша лауазымдық жалақының мөлшерi, әрi қарайғы өзгерiстер ескерiле отырып, сақталады.
6. Төмен тұрған лауазымға ауыстырылған МТК қызметкерi кейiннен қызметтiк бiлiктiлiгi, жұмыс тәжiрибесi, iскерлiк және жеке басының қасиеттерi, денсаулығы бойынша қызмет бабында жоғарлатылуы мүмкiн.
7. МТК қызметкерi лауазым бойынша мiндеттер атқарушы болып тағайындалуы мүмкiн. Бұл ретте бос тұрған лауазым бойынша оның мiндеттердi үздiксiз атқару мерзiмi екi айдан, ал бос тұрмаған лауазым бойынша - төрт айдан аспауы керек.
8. МТК қызметкерi қылмыс жасады деп айыпкер ретiнде жауапқа тартылғанда, сондай-ақ қызметтiк тәртiптi өзiнiң қызметтiк мiндеттерiн орындауға мүмкiндiк бермейтiндей өрескел бұзған жағдайда МТК Төрағасы белгiлеген тәртiп бойынша лауазымнан уақытша шеттетiлуi мүмкiн. Лауазымнан шеттетiлген уақыт үшiн қызметкерге ақшалай үлес толық мөлшерде төленедi.
9. Ұйымдық-штаттық шаралар өткiзу кезiнде МТК қызметкерi МТК Төрағасы белгiлеген тәртiп бойынша ақшалай үлес мөлшерi сақталып, екi айдан аспайтын мерзiмге дейiн МТК-нiң қарамағына енгiзiлiп, атқаратын лауазымынан босатылуы мүмкiн. Белгiленген мерзiм аяқталғанға дейiн осы қызметкердi жұмысқа орналастыру мәселесi шешiледi.
10. Қызметкердiң МТК-нiң қарамағында болған мерзiмiне науқастануына байланысты қызметтiк мiндеттерден босатылу, кезектi және қосымша демалыстарда болу уақыты кiрмейдi.
18-бап. МТК қызметкерiн басқа жерге
қызметке ауыстыру
1. МТК қызметкерiн басқа жерге, соның iшiнде МТК-нiң және оның органдарының жаңа жерге орналасуына байланысты ауыстыру, егер контрактта басқаша көзделмесе, оның келiсiмiн ескере отырып жүргiзiледi.
2. МТК қызметкерiнiң өз бастамасы бойынша басқа жерге ауыстыру МТК-нiң тиiстi органдары (бөлiмшелерi) басшыларының келiсiмiмен жүзеге асырылады.
3. МТК қызметкерi мен оның отбасы мүшелерiнiң жаңа қызмет орнына жол шегуi және мүлкiн тасымалдау Қазақстан Республикасының Үкiметi белгiлеген тәртiппен МТК-нiң қаражаты есебiнен жүзеге асырылады.
19-бап. МТК-нiң iссапарға жiберiлген қызметкерлерiнiң
қызмет өткеру тәртiбi
1. Мемлекеттiк органдарға iссапарға жiберiлген МТК қызметкерлерi, Қазақстан Республикасының заңдарында өзгеше көзделмесе, осы Ережемен белгiленген тәртiппен мынадай ерекшелiктер ескерiле отырып, қызмет өткередi:
1) iссапарға жiберiлген қызметкерлердi тағайындау мен ауыстыру МТК басшы құрамын қызметкерлерiнiң өзге мемлекеттiк органдарда атқаруға тиiс лауазымдар шегiнде жүргiзiледi;
2) әдiлет полковнигiне дейiнгiнi қоса алғанда арнаулы атақтар - iссапарға жiберiлген қызметкерлерге осы Ережеде көзделген тәртiппен мемлекеттiк органдардың тиiстi басшыларының ұсынысы бойынша берiледi. Аталған қызметкерлерге жоғары басшы құрамның арнаулы атақтарын берудi МТК Төрағасы мен тиiстi мемлекеттiк органдар басшыларының бiрлескен ұсынысы бойынша Қазақстан Республикасының Президентi жүргiзедi;
3) iссапарға жiберiлген қызметкерлердi қызметтен босату осы Ережеде көзделген негiздер мен тәртiп бойынша мемлекеттiк органдар басшыларының ұсынысы бойынша жүргiзiледi;
4) iссапарға жiберiлген МТК қызметкерлерiнiң еңбегiне ақы төлеу заңға сәйкес жүзеге асырылады.
2. Iссапарға жiберiлген МТК қызметкерлерiне заттай мүлiк пен азық-түлiк үлесiнiң орнына ақшалай өтемақы төленуi мүмкiн.
3. Iссапарға жiберiлген МТК қызметкерлерi мен олардың отбасы мүшелерiне МТК қызметкерлерi мен олардың отбасы мүшелерi үшiн заңмен белгiленген құқықтар, жеңiлдiктер мен артықшылықтар сақталады.
20-бап. Аттестациялау
1. МТК қызметкерлерiнiң қойылатын талаптарға қызмет тұрғыда сай келуiн анықтау мақсатында аттестациялау жүргiзiледi.
2. МТК-де қызмет өткеру туралы белгiлi бiр мерзiмге контракт жасасқан қызметкер оны ұзартқан ретте, ал белгiленбеген мерзiмге контракт жасасқан қызметкер қызмет өткерудiң әр үш жылы сайын аттестациядан өтедi.
3. МТК қызметкерлерi, сонымен бiрге жоғары тұрған қызметке тағайындалуға ұсынылған ретте, төменгi тұрған лауазымға немесе МТК-нiң басқа қызметiне (бөлiмшесiне) ауысқанда, сондай-ақ осы Ереженiң 51-бабының 1-тармағындағы "ж","з", "и" тармақшаларында белгiленген негiздер бойынша жұмыстан босатылғанда аттестацияланады.
4. Аттестацияны, оның iшiнде кезектен тыс аттестацияны жүргiзу
тәртiбiн МТК Төрағасы айқындайды.
21-бап. МТК қызметкерлерiн әскери есептен шығару
МТК-нiң қатардағы және басшы құрамның лауазымдарына
тағайындалған Қазақстан Республикасының азаматтары, оқу орындарының
курсанттары мен тыңдаушылары әскери қызметке шақырылуға тиiс емес,
олар әскери есептен шығарылып, МТК-нiң арнаулы есебiнде тұрады.
III тарау
МТК ҚАТАРДАҒЫ ЖӘНЕ БАСШЫ ҚҰРАМЫНЫҢ АРНАУЛЫ
АТАҚТАРЫН БЕРУ ТӘРТIБI
22-бап. Арнаулы атақтарды берудiң жалпы шарттары
1. МТК-нiң қызметкерлерiне арнаулы атақтар олардың бiлiктiлiгiне, бiлiмiне, қызметке көзқарасына, еңбек сiңiрген жылдары мен атқаратын штаттық лауазымына, сондай-ақ осы Ережеде көзделген басқа да шарттар ескерiле отырып дербес берiледi.
2. Берiлу кезектiлiгiне байланысты арнаулы атақтар бастапқы және кезектi болып бөлiнедi.
3. Кiшi басшы құрамның бастапқы және кезектi арнаулы атақтарын облыстар, республикалық бағыныстағы қалалар мен Республика астанасы бойынша басқарма (бас басқарма) бастықтары мен МТК Төрағасы осындай құқық берген өзге де бастықтары бередi.
4. Аға және жоғары басшы құрамның лауазымына қабылданған азаматтарға, егер олардың запастағы әскери атағы неғұрлым жоғарырақ болмаса, әдетте, әдiлет майорынан жоғары емес бастапқы арнаулы атақ берiлуi мүмкiн.
5. Орта және аға басшы құрамның бастапқы арнаулы атақтарын МТК Төрағасы бередi.
6. осы Ережеде көзделген жағдайларды қоспағанда, басшы құрамның
кезектi арнаулы атақтары кезектiлiк тәртiбiмен, атқаратын штаттық
лауазыммен көзделген арнаулы атаққа сай келген жағдайда және бұрынғы
атағында белгiленген еңбек сiңiру мерзiмi өткеннен кейiн берiледi.
7. Қарамағындағы қызметкердi кезектi арнаулы атаққа ұсынуды
негiзсiз кешiктiрген МТК органының бастығы тәртiптiк жауапкершiлiкке
тартылады.
8. Кезектi арнаулы атақтар берудiң осы Ережеде көзделмеген
шарттарын белгiлеуге тыйым салынады.
23-бап. Қатардағы және кiшi басшы құрамның арнаулы
атақтарында еңбек сiңiру мерзiмдерi
1. Қатардағы және кiшi басшы құрамның арнаулы атақтарында еңбек
сiңiрудiң мынадай мерзiмдерi белгiленедi:
1) әдiлет кiшi сержант атағында - 1 жыл;
2) әдiлет сержанты атағында - 2 жыл;
3) әдiлет аға сержанты атағында - 3 жыл;
4) әдiлет прапорщигi атағында - 5 жыл;
2. Қатардағы әдiлет қызметкерi, әдiлет старшинасы, сондай-ақ
аға әдiлет прапорщигi атақтарында еңбек сiңiру мерзiмдерi
белгiленбейдi.
24-бап. Орта және аға басшы құрамның арнаулы
атақтарында еңбек сiңiру мерзiмдерi
1. Орта және аға басшы құрамның арнаулы атақтарында еңбек
сiңiрудiң мынадай мерзiмдерi белгiленедi:
1) әдiлет кiшi лейтенанты атағында - 1 жыл;
2) әдiлет лейтенанты атағында - 2 жыл;
3) әдiлет аға лейтенанты атағында - 3 жыл;
4) әдiлет капитаны атағында - 3 жыл;
5) әдiлет майоры атағында - 4 жыл;
6) әдiлет подполковнигi атағында - 5 жыл.
2. Төрт және одан да көп жылдық жоғары оқу орнын бiтiрген соң әдiлет лейтенанты арнаулы атағы берiлген және оқу орнында алған мамандығы немесе соған жақын мамандық бойынша МТК-де қызмет атқаратын МТК қызметкерлерi үшiн әдiлет лейтенанты атағында еңбек сiңiру мерзiмi 1 жыл болып белгiленедi.
3. Әдiлет полковнигi атағында, сондай-ақ жоғары басшы құрамның атақтарында еңбек сiңiру мерзiмдерi белгiленбейдi.
25-бап. Әдiлет кiшi лейтенанты арнаулы атағын беру
МТК Төрағасы әдiлет кiшi лейтенанты бастапқы арнаулы атағын:
1) қатардағы және кiшi басшы құрамның лауазымдарында тұрған, МТК-нiң арнаулы курстарын, басқа мемлекеттiк органдардың арнаулы орта оқу орындарын бiтiрiп, орта басшы құрамның лауазымдарын тағайындалған МТК қызметкерлерiне;
2) кiшi басшы құрамның лауазымдарында тұрған, жоғары және арнаулы орта оқу орындарының соңғы курстарында оқитын, сондай-ақ аяқталмаған жоғары бiлiмi бар (төртiншi курстан төмен болмау керек), және орта басшы құрамның лауазымдарына тағайындалған МТК қызметкерлерiне;
3) арнаулы орта оқу орындарын бiтiрген және орта басшы құрамның лауазымдарына тағайындалған азаматтарға;
4) осы Ереженiң 8-бабына сәйкес жедел қызмет бөлiмшелерiндегi орта басшы құрамның лауазымдарына тағайындалған азаматтарға бередi.
26-бап. Әдiлет лейтенанты арнаулы атағын беру
Әдiлет лейтенанты арнаулы атағы:
1) осы Ережеде белгiленген еңбек сiңiру мерзiмi бiткеннен кейiн әдiлет кiшi лейтенанттарына, ал жоғары оқу орындарын бiтiргендерге - осы атағында еңбек сiңiру мерзiмiне қарамастан;
2) қатардағы және кiшi басшы құрамның арнаулы атақтарын алған,
МТК мен IIМ-нiң жоғары оқу орындарын немесе арнаулы орта оқу
орындарын бiтiрген және орта басшы құрамның лауазымдарына
тағайындалған МТК қызметкерлерiне;
3) МТК мен IIМ-нiң жоғары немесе арнаулы орта оқу орындарын
күндiзгi оқу нысаны бойынша бiтiрген адамдарға;
4) жоғары бiлiмi бар, орта және аға басшы құрамның
лауазымдарына тағайындалған азаматтарға берiледi.
27-бап. Орта, аға және жоғары басшы құрамның
кезектi арнаулы атақтарын беру
1. Орта және аға басшы құрамның кезектi арнаулы атақтарын:
1) әдiлет майорына дейiн қоса алғанда - облыстар, республикалық маңызы бар қалалар, Республика астанасы бойынша басқарма (бас басқармалар) бастықтары мен МТК Төрағасы осындай құқық берген басқа бастықтар бередi;
2) әдiлет полковнигiне дейiн қоса алғанда - МТК Төрағасы бередi.
2. Жоғары басшы құрамның арнаулы атақтарын МТК Төрағасының ұсынысымен Қазақстан Республикасының Президентi бередi.
3. Орта және аға басшы құрамның кезектi арнаулы атақтары МТК немесе IIМ оқу орындарының тыңдаушыларына, адъюнктерi мен докторанттарына олардың оқуға түскенге дейiнгi атқарған штаттық лауазымдарына сәйкес, оқуға түскеннен кейiнгi штаттық лауазымдар бойынша арнаулы атақтардың енгiзiлген өзгерiстерi ескерiлмей берiледi; ол оқу орындарын, адъюнктураны, докторантураны бiтiргеннен кейiн оқу бiтiргеннен кейiн қызметкерлер тағайындалған штаттық лауазымдар атақтарына кезектi арнаулы атақтары сәйкес келген ретте берiледi.
28-бап. Қазақстан Республикасының Қарулы Күштерiнде
запаста тұрған азаматтарға қызметке кiрген
кезде арнаулы атақтар беру
1. Қазақстан Республикасының Қарулы Күштерiнде запаста тұрған азаматқа, МТК басшы құрамның лауазымына тағайындалғаннан кейiн оның өзiнде бар әскери атағынан төмен емес арнаулы атақ берiледi.
2. Запастағы офицерлер орта, аға және жоғары басшы құрамның лауазымдарына тағайындалған кезде, егер олардың лауазымға тағайындалатын күнге мiндеттi әскери қызметi мен запаста болу уақыты кезеңiнде өздерiне берiлген әскери атақтарда белгiленген мерзiмдi өткерген болса, оларға бастапқы арнаулы атақ өздерiнде бар әскери атақтан бiр саты жоғары берiлуi мүмкiн.
29-бап. Арнаулы атақтарды мерзiмiнен бұрын
немесе бiр саты жоғары беру
1. Басшы құрамның кезектi арнаулы атағы бұрынғы атағында белгiленген еңбек сiңiру мерзiмi бiтпес бұрын немесе атқаратын штаттық лауазымымен көзделгеннен бiр саты жоғары арнаулы атақ қызметте жоғары нәтижелерге қол жеткiзгенi және қызметтiк мiндеттерiн үлгiлi атқарғаны үшiн көтермелеу шарасы ретiнде берiледi.
2. Бұл ретте кiшi басшы құрамның арнаулы атақтарын осы Ереженiң 22-бабының 3-тармағында көрсетiлген бастықтар, ал орта және аға басшы құрамның арнаулы атақтарын МТК Төрағасы бередi.
3. Арнаулы атақ мерзiмiнен бұрын атқаратын штаттық лауазым бойынша көзделген атақтың шегiнде берiледi, ал ғылыми дәрежесi немесе ғылыми атағы бар МТК қызметкерлерiне лауазым бойынша көзделген атақтан бiр саты жоғары (жоғары басшы құрамның арнаулы атақтарын қоспағанда) атақ берiлуi мүмкiн.
4. Арнаулы атақтар мерзiмiнен бұрын арнаулы атақта еңбек сiңiрудiң белгiленген мерзiмiнiң кем дегенде жартысы өткенде және берiлетiн арнаулы атақ атқаратын штаттық лауазымымен көзделген атаққа сәйкес болған жағдайда жүзеге асырылады.
5. Атқаратын штаттық лауазымымен көзделген арнаулы атақтан бiр саты жоғары кезектi арнаулы атақ бұрынғы арнаулы атағында кем дегенде бiр жарым еңбек сiңiру мерзiмi өткенде берiледi. Бұл ретте арнаулы атақтарды мерзiмiнен бұрын және бiр саты жоғары беру, әдетте, МТК-де қызмет атқарған барлық кезең iшiнде 2 мәртеден көп болмауы керек.
30-бап. Арнаулы атағында еңбек сiңiру
мерзiмiн есептеу
1. Арнаулы атағында еңбек сiңiрген мерзiмi осы атақты беру туралы бұйрыққа қол қойылған күннен бастап есептеледi. МТК қызметкерлерiнiң төмендетiлген арнаулы атақта өткiзген уақыты қайта қалпына келтiрiлген атақта еңбек сiңiрген мерзiмiне қосылмайды.
2. Қатардағы және кiшi басшы құрамның атақтары бар, орта басшы құрамның лауазымына тағайындалған МТК қызметкерлерi өздерiнде бiр атақтарында еңбек сiңiрген мерзiмiне қарамастан орта басшы құрамның бастапқы арнаулы атағына ұсынылады.
31-бап. Кезектi арнаулы атақ берудi кiдiрту
МТК-нiң немесе оның тиiстi органының қарамағындағы не тәртiптiк жаза қолданылған (ауызша жарияланғандардан басқа), сондай-ақ үстiнен қылмыстық iс қозғалған немесе қызмет тәртiбiн бұзу фактiлерi бойынша қызметтiк тексеру жүргiзiлiп жатқан қызметкерлердi лауазымға тағайындалғанша, тәртiптiк жазасы алынып, ақтайтын негiздер бойынша қылмыстық iс тоқтатылғанша немесе қызметтiк тексеру аяқталғанша кезектi арнаулы атақтарға ұсыну жүргiзiлмейдi.
32-бап. Арнаулы атағын төмендету және арнаулы
атағынан айыру
1. Кiшi басшы құрамның атағы бар МТК қызметкерлерiнiң арнаулы атағын бiр саты төмендету аталмыш атақтарды беруге құқығы бар тiкелей бастықтардың шешiмiмен тәртiптiк жаза шарасы ретiнде қолданылады.
2. Орта және аға басшы құрамның атағы бар МТК қызметкерлерiнiң арнаулы атағын тек МТК Төрағасы ғана бiр саты төмендете алады.
3. Арнаулы атақтары төмендетiлген МТК қызметкерлерiнiң бұрынғы арнаулы атағы атқаратын штаттық лауазымдарына қарамастан атақты төмендету туралы шешiм қабылданған бастықтардың, оларға теңдес және жоғары тұрған бастықтардың бұйрығымен, бiрақ атақ төмендетiлген күннен кейiн кемiнде бiр жылдан кейiн және оң аттестациялау болған жағдайда қалпына келтiрiледi.
4. МТК қызметкерiнiң арнаулы атағы қайта қалпына келтiрiлгенге
дейiн және оған кезектi арнаулы атақ берiлгенге дейiн оның арнаулы
атағын қайталап төмендетуге жол берiлмедi.
5. МТК қызметкерлерi, сондай-ақ "отставкадағы" деген сөз
қосылған арнаулы атағы бар адамдар заңға сәйкес арнаулы атақтардан
айырылуы мүмкiн.
IV Тарау
ҚЫЗМЕТ ТӘРТIБI
33-бап. МТК-дегi қызмет тәртiбi
МТК-дегi қызмет тәртiбi МТК қызметкерлерiнiң заңмен, Антпен, қызмет ету туралы контрактпен белгiленген, сондай-ақ МТК Төрағасының, тiкелей бастықтардың бұйрықтарымен өздерiне жүктелген мiндеттердi орындау барысында тәртiп пен ереженi сақтауын және өздерiне берiлген құзыреттi жүзеге асыруын бiлдiредi.
34-бап. МТК органы бастығының қызмет тәртiбiн
қолдау жөнiндегi мiндеттерi
Бастық өз қарамағындағылардың арасындағы қызмет тәртiбiнiң
жай-күйi үшiн жауап бередi. Оларға жоғары талап қоюмен қатар ол:
1) қарамағындағылардың еңбек етуiне, демалуына және
бiлiктiлiгiн арттыруға қажеттi жағдай жасауға;
2) қарамағындағылардың қызметтiк мiндеттерiн орындауға деген
жауапкершiлiк сезiмiне баулуға;
3) қарамағындағылардың қызметтiк iс-әрекетiне баға беруде
жариялылық пен әдiлдiктi қамтамасыз етуге;
4) қарамағындағылардың абыройы мен қадiр-қасиетiн сыйлауға;
5) жеке құраммен жұмыс iстегенде тамыр-таныстықты болдырмауға,
жеке сипаты бар себептерін немесе МТК қызметiндегi кемшiлiктердi
сынағаны үшiн МТК қызметкерлерiн қудалауға жол бермеуге мiндеттi.
35-бап. Қызметтiк iс-әрекетiндегi жетiстiктерi
үшiн көтермелеу
1. Мiндеттерiн үлгiлi орындағаны және қызметте қол жеткiзген
жоғары жетiстiктерi үшiн МТК қызметкерлерiне көтермелеудiң мынадай
түрлерi көзделедi:
1) алғыс жариялау;
2) ақшалай сыйақы беру;
3) бағалы сыйлықпен наградтау;
4) Құрмет кiтабына енгiзу;
5) Құрмет грамотасымен наградтау;
6) омырау белгiсiмен наградтау;
7) жеке қарумен наградтау;
8) кезектi арнаулы атақты мерзiмiнен бұрын беру;
9) атқаратын штаттық лауазымымен көзделген атақтан бiр саты
жоғары арнаулы атақ беру;
10) Құрметтi атақ беруге ұсыну.
2. Көтермелеу шарасы ретiнде бұрынғы қолданылған тәртiптiк жазаны мерзiмiнен бұрын алып тастау қолданылуы мүмкiн.
3. МТК-нiң оқу орындарында осы бапта көрсетiлген көтермелеу түрлерiнен басқа стипендия мөлшерiн жоғарылату және оқу орнынан тысқары кезектен тыс демалысқа шығуға рұқсат ету қолданылады.
4. Қызметтiк борышын орындау кезiнде көрсеткен ерлiгi мен
батылдығы, басқа да сiңiрген ерекше еңбегi үшiн МТК қызметкерлерi
заңға сәйкес Қазақстан Республикасының мемлекеттiк наградаларымен
наградталуға ұсынылуы мүмкiн.
36-бап. Қызмет тәртiбiн бұзғаны үшiн қолданылатын
жазалар
1. Қызмет тәртiбiн бұзғаны үшiн МТК қызметкерлерiне мынадай
жаза түрлерi қолданылуы мүмкiн:
1) ескерту;
2) сөгiс;
3) қатаң сөгiс;
4) қызметiне толық сай еместiгiн ескерту;
5) лауазымынан төмендету;
6) арнаулы атағын бiр сатыға төмендету;
7) омырау белгiсiнен айыру;
8) МТК-нен шығару.
2. МТК-нiң оқу орындарында аталған жаза түрлерiнен басқа қызмет бойынша нарядқа кезектен тыс тағайындау (қарауылға немесе бөлiмше бойынша кезекшiлiкке тағайындаудан басқа), сондай-ақ оқу орнынан шығару түрiнде жаза қолданылады.
37-бап. Көтермелеу мен тәртiптiк жаза қолданудың тәртiбi
1. Көтермелеу мен тәртiптiк жазаны тiкелей бастықтар өздерiне берiлген құқықтар шегiнде қолданады.
2. МТК қызметкерлерi қызмет бабында, уақытша болса да, бағынатын бастықтар тiкелей бастықтар болып табылады.
3. Бағыныстағы ең жақын тұрған тiкелей бастық оның төте бастығы болып табылады.
4. Қызмет бабында бiр-бiрiне бағынбайтын МТК қызметкерлерi аға немесе кiшi болуы мүмкiн. Олардың бiр-бiрiнен жоғарылығы арнаулы атақпен, ал атақтары бiрдей болған жағдайда атқаратын лауазымымен анықталады.
5. Бастық лауазымдық мiндеттердi уақытша атқарған жағдайда, егер бұл жайында бұйрықта жарияланса, уақытша атқаратын лауазымның тәртiптiк құқықтарын пайдаланады.
6. Төменгi бастықтарға берiлген тәртiптiк құқықтар жоғары бастықтарға да тиесiлi.
7. Көтермелеулер мен тәртiптiк жазалар бұйрықпен жарияланады. Алғыс, ескерту, сөгiс, кезектен тыс нарядқа қою ауызша да жариялануы мүмкiн.
8. Бұйрықпен берiлген жазаны ауызша алып тастауға болмайды.
9. Көтермелеулер мен тәртiптiк жазалар туралы МТК қызметкерiнiң жеке өзiне сап алдында немесе кеңесте (жиналыста) жарияланады.
10. Жауапқа тартылған МТК қызметкерiнен жаза берiлгенге дейiн жазбаша түсiнiктеме беру талап етiлуге тиiс, қажет болса, тексеру нәтижелерi бойынша қорытынды тұжырым шығарыла отырып, онда көрсетiлген мәлiметтерге тексеру жүргiзiледi.
11. Тәртiптiк жаза жасалған жолсыздық туралы бастыққа белгiлi болған күннен бастап 10 күн iшiнде берiлуге тиiс, ал қызмет бабындағы тексеру жүргiзiлiп, қылмыстық iс немесе әкiмшiлiк тәртiп бұзушылық туралы iс қозғалса, тиiсiнше тексеру бiткен, құзыреттi орган немесе лауазымды адам қылмыстық iстi немесе әкiмшiлiк тәртiп бұзушылық туралы iстi қарап, ол жөнiнде соңғы шешiм шығарған күннен бастап тиiсiнше бiр айдан кешiктiрiлмей берiлуге тиiс, бұған кiнәлiнiң сырқаттанған немесе демалыста болған уақыты қосылмайды.
12. Қызмет тәртiбiнiң бұзылған әрбiр оқиғасы үшiн тек бiр ғана тәртiптiк жаза берiледi.
13. Жазаға тартылған МТК қызметкерiне оны берудiң себебi көрсетiлген тәртiптiк жаза қолдану туралы бұйрық қолхат арқылы жарияланады.
14. Тәртiптiк жаза дереу, бiрақ берiлген күннен бастап бiр айдан кешiктiрiлмей орындалады. Осы мерзiм бiткеннен кейiн, жаза қолданылмайды, бiрақ есепке алынуға тиiс.
15. МТК қызметкерiне бұйрықпен берiлген тәртiптiк жаза, егер ол берiлген күннен бастап осы қызметкер бiр жыл iшiнде жаңадан тәртiптiк жазаға тартылмаса, алынып тасталған болып саналады.
16. Көтермелеу ретiнде тәртiптiк жазаны жаза қолданған бастық немесе оған теңдес не жоғары тұрған тiкелей бастық мерзiмiнен бұрын ала алады.
17. Лауазымы төмендетiлген МТК қызметкерiн қызмет бабында ауыстыру осы Ереженiң 17-бабында белгiленген тәртiппен жүзеге асырылады.
18. Арнаулы атағын төмендету түрiнде тәртiптiк жаза қолданылған жағдайда, бұрынғы атағы осы Ереженiң 32-бабында белгiленген тәртiппен қайт қалпына келтiрiлуi мүмкiн.
19. Қызметкер науқастанған кезде немесе ол демалыста не iссапарда болған кезеңде, сондай-ақ оның жолсыздық жасағанына алты айдан аса, ал қаржы-шаруашылық қызметiне жүргiзiлген тексерiс немесе тексеру нәтижелерi бойынша - оның жасалған күнiнен бастап екi жылдан астам уақыт өткен жағдайда тәртiптiк жаза қолданылуға тиiс емес. Аталған мерзiмге МТК қызметкерiнiң демалыста болған кезi, науқастанған уақыты, сондай-ақ қылмыстық iс немесе әкiмшiлiк құқық бұзушылық жөнiндегi iс жүргiзiлу уақыты кiрмейдi.
38-бап. Бастықтардың көтермелеудi қолдану және
тәртiптiк жаза беру жөнiндегi құқықтары
мен жауапкершiлiгi
1. Бастықтардың көтермелеудi қолдану және тәртiптiк жаза беру жөнiндегi құқықтарын МТК Төрағасы белгiлейдi.
2. Егер МТК қызметкерiне бастықтың пiкiрiнше өзiнiң құқықтары шегiнен тысқары көтермелеу немесе жаза шараларын қолдану қажет болса, онда ол бұл жөнiнде жоғары тұрған бастыққа өтiнiш жасайды.
3. Жоғары тұрған бастық төменгi бастық қолданған тәртiптiк жазаның күшiн жоюға, жеңiлдетуге немесе егер алдыңғы жарияланған жаза жасалған жолсыздықтың ауырлығына сәйкес келмесе, одан қатаңырақ жаза белгiлеуге құқылы.
4. МТК-нiң тергеу аппараты мен оның органдарының қызметкерлерiне тәртiптiк жазаны оларды лауазымға тағайындау құқығы берiлген бастықтар, ал қызметкерлердiң iс жүргiзу қызметiмен байланысты жағдайларда - тиiстi тергеу бөлiмшелерi басшыларының келiсуiмен қолданады.
5. Көтермелеудi қолдану және тәртiптiк жазалар беру жөнiндегi
құқықтарын шегiнен асыра пайдаланған бастық бұл үшiн тәртiптiк
жауапкершiлiкке тартылады.
39-бап. МТК қызметкерлерiнiң тәртiптiк жазаға
шағымдануы жөнiндегi құқықтары
МТК қызметкерi берiлген тәртiптiк жаза жөнiнде жоғары тұрған
бастықтарға өз кезегiмен МТК Төрағасына дейiн шағымдануға хақылы.
V тарау
ҚЫЗМЕТ ШАРТТАРЫ
40-бап. Iшкi тәртiп
1. МТК-дегi iшкi тәртiптi олардың бастықтары заңдарға сәйкес
және МТК Төрағасы айқындайтын тәртiппен осы органдардың қызмет
ерекшелiктерiне қарай белгiлейдi.
2. Қажет болған жағдайда МТК қызметкерлерi белгiленген уақыттан
тыс, сондай-ақ түнгi уақытта, демалыс және мейрам күндерi қызметтiк
мiндеттерiн орындауға тартылуы мүмкiн.
41-бап. Демалыстар
1. МТК қызметкерлерiне ақшалай үлесi сақтала отырып демалыстың
мынадай түрлерi белгiленедi:
1) кезектi жылдық;
2) қысқы мерзiмдi;
3) науқастануына байланысты;
4) оқуына байланысты;
5) каникулдық;
6) МТК-нiң немесе IIМ-нiң оқу орнын аяқтауға байланысты;
7) қосымша (қызмет стажы, залалды жағдайларда мiндеттерiн
атқарғаны, қызметтiң ерекше сипаты үшiн).
2. Одан басқа, заңдарға сәйкес МТК қызметкерлерiне нәрестелi болуына, балаларын күтуiне, сондай-ақ заңмен белгiленген өзге де демалыстар берiледi.
3. Жұмыстан босатылғаннан басқа жағдайларда, демалысын пайдаланбаған МТК қызметкерлерiнiң, демалысын ақшалай өтемақымен ауыстыруға берiлмейдi.
4. Демалыстың ұзақтығы тәулiкпен есептеледi. Бұл ретте заңмен жұмыс күндерi емес деп белгiленген мейрам күндерi демалыстың ұзақтығын белгiлеуде есепке алынбайды.
5. МТК қызметкерiне демалыс (емделу) орнына барып-қайту жол ақысы демалыстың мынадай түрлерi бойынша берiледi:
1) кезектi жылдық;
2) науқастануына байланысты;
3) оқуына байланысты;
4) каникулдық (жылына бiр рет);
5) МТК-нiң немесе IIМ-нiң оқу орнын бiтiруiне байланысты.
6. Жалпы ұзақтығы 40 және одан көп тәулiк болатын кезектi және қосымша демалысқа құқығы бар МТК қызметкерлерiне олардың тiлегi бойынша демалысын өткiзетiн жерге барып-қайту жол ақысы бiр рет төлей отырып, демалысын екi мерзiмде пайдалануға рұқсат етiледi.
7. МТК-нiң және IIМ-нiң жоғары және арнаулы орта оқу орындарында сырттай оқу нысаны бойынша оқитын МТК қызметкерлерi оқуына байланысты демалысқа барғанда iссапар құжаттарымен қамтамасыз етiледi.
8. МТК қызметкерлерiне кезектi, қысқа мерзiмдi демалыстар, МТК-нiң және IIМ-нiң оқу орындарын бiтiруiне байланысты демалыстар, сондай-ақ науқастануына байланысты демалыстар берiлген кезде демалыстың белгiленген ұзақтығынан тыс демалыс (емделу) орнына барып-қайту үшiн уақыт қоса берiледi.
42-бап. Кезектi жылдық демалыс
1. МТК қызметкерлерiне кезектi жылдық демалыс ұзақтығы 30 тәулiк, ал биiк таулы жерлерде (биiктiгi 1500 м. және одан жоғары), сондай-ақ Қазақстан Республикасының Үкiметi айқындайтын Қазақстан Республикасының басқа да климаттық жағдайлары ауыр және қолайсыз жерлерiнде қызмет өткеретiн МТК қызметкерлерiне - еңбек сiңiрген жылдарына қарамастан ұзақтығы 45 тәулiк етiп берiледi.
2. Кезектi жылдық демалыс кезектi жылдық жоспарына сәйкес күнтiзбелiк жыл iшiнде МТК-нiң әрбiр қызметкерiне берiлуге тиiс.
3. МТК-не немесе оның органдарына қызметке кiрген жылы берiлетiн кезектi жылдық демалыстың ұзақтығы оның жұмысқа кiрген күнiнен бастап әрбiр толық айы үшiн нақты атқарған уақытына сәйкес демалыстың он екiден бiр бөлiгi есебiмен есептеледi. Бұл ретте ұзақтығы 10 тәулiк және онан да көп демалысқа құқығы бар МТК қызметкерлерiне демалыс орнына барып-қайту жол ақысы төленедi және демалысынан тыс жол жүруiне уақыт берiледi. МТК қызметкерiнiң тiлегi бойынша ұзақтығы 10 тәулiктен кем болатын демалыс оған келесi жылы кезектi жылдық демалысымен бiр мезгiлде берiлуi мүмкiн.
4. Биiк таулы жерлерде, климаттық жағдайы ауыр және қолайсыз жерлерде қызмет өткеретiн МТК қызметкерлерiне өздерiнiң қалауы бойынша екi жылғы кезектi жылдық демалыстары бiр демалысқа бiрiктiрiлуi мүмкiн. МТК-нiң аталған қызметкерлерi қызмет бабымен басқа жерлерге ауыстырылған жағдайда, олар пайдаланбаған бiрiктiрiлген демалыс жаңа қызмет орнында берiледi. Қызметтiк қажеттiлiк болған жағдайда жаңа қызмет орнында бiрiктiрiлген демалыс әр жолы тасымалдау құжаттары берiле отырып, екi мерзiмге берiлуi мүмкiн.
5. Осы Ереженiң 51-бабының "а", "б", "в", "г" тармақтарында көрсетiлген негiздер бойынша қызметтен босатылған МТК қызметкерлерiне өздерiнiң қалауы бойынша кезектi жылдық демалыс берiледi. Қызметтен босатылған жылы пайдаланылмаған кезектi жылдық демалыс орнына МТК Төрағасы анықтайтын тәртiппен ақшалай өтемақы төленедi.
6. Кезектi демалыс уақытында науқастанып қалған МТК қызметкерлерiне емдеуде болған күндерiнiң санына орай демалысы ұзартылады.
43-бап. Қысқа мерзiмдi демалыс
1. Кезек күттiрмейтiн әлеуметтiк-тұрмыстық мәселелердi шешу, туыстық борышын өтеу үшiн, сондай-ақ өзге де орынды себептер бойынша МТК қызметкерлерiне жол жүру ақысы төленбей, ұзақтығы бiр жыл iшiнде 10 тәулiкке дейiн қысқа мерзiмдi, ақылы демалыс берiледi.
2. Қысқа мерзiмдi демалыс кезектi жылдық демалыс есебiне кiрмейдi.
44-бап. Науқастануға байланысты демалыс
1. Науқастануына байланысты демалыс МТК қызметкерлерiне әскери-дәрiгерлiк комиссияның қорытындысы бойынша берiледi.
2. Науқастануына байланысты демалыстың ұзақтығы аурудың сипатымен айқындалады. Заңдарда емделуге ұзағырақ мерзiм көзделгеннен басқа жағдайларда науқастануына және емдеу мекемелерiнде емделуiне байланысты демалыста үздiксiз болу уақыты төрт айдан аспауға тиiс. Бұл мерзiм тiкелей бастықтың - облыс, республикалық маңызы бар қала, Республика астанасы бойынша басқарма (бас басқарма) бастығының, оған теңдес және одан жоғары тұрған бастықтардың шешiмiмен - емдеу мекемесiнiң қорытындысы негiзiнде ұзартылуы мүмкiн. Науқастануына байланысты демалыста және емделуде үздiксiз болуының белгiленген мерзiмi аяқталғанда МТК қызметкерлерi әрi қарай қызмет өткеруге жарамдылығы туралы мәселенi шешу үшiн әскери-дәрiгерлiк комиссияның куәландыруынан өтуге тиiс.
3. МТК қызметкерлерi қызметтiк мiндеттерiн атқару үстiнде жарақат, контузия алса немесе мертiккен жағдайда олардың емделуде болу уақыты шектелмейдi. Аталған қызметкерлер медициналық куәландыруға емдеу аяқталған соң немесе ауру қорытындысы анықталғанда жiберiледi.
4. Науқастануына байланысты берiлген демалыс кезектi жылдық
демалыс есебiне кiрмейдi.
5. МТК қызметкерлерi қызметтен босатылған кезде науқастануына
байланысты демалыс берiлмейдi.
45-бап. Каникулдық демалыстар
МТК немесе IIМ оқу орындарында күндiзгi оқу нысаны бойынша
оқитын МТК қызметкерлерiне:
1) ұзақтығы 14 тәулiктен тұратын қысқы каникулдық демалыс;
2) ұзақтығы 30 тәулiктен тұратын жазғы каникулдық демалыс
берiледi.
46-бап. Оқу орнын бiтiруге байланысты демалыс
1. МТК-нiң немесе IIМ-нiң оқу орындарын бiтiрушiлерге оқу орнын бiтiрген кезде 30 тәулiктен тұратын демалыс берiледi. Бұл демалыс, сондай-ақ басқа мемлекеттiк органдардың жоғары және арнаулы орта оқу орындарын бiтiрушiлерге берiлетiн демалыс, осы оқу орындарын
бiтiрген соң тiкелей МТК-не қызметке қабылданған болса, ағымдағы
жылғы кезектi жылдық демалыс есебiне кiредi.
2. Оқу орнын бiтiруге байланысты демалыс түлек қызмет өткеру
орнына жiберiлгенге дейiн пайдаланылуға тиiс.
47-бап. Қосымша демалыстар
1. МТК-дегi қызмет өткеру стажы бойынша қосымша жылдық ақылы
демалыс:
1) 10 жылғы қызметтен соң - ұзақтығы 5 тәулiк;
2) 15 жылғы қызметтен соң - ұзақтығы 10 тәулiк;
3) 20 жылғы қызметтен соң - ұзақтығы 15 тәулiк етiп берiледi.
2. Залалды жағдайлардағы қызметi үшiн қосымша жылдық демалыстың
ұзақтығы заңдарға сәйкес белгiленедi.
3. Дене мен жүйкеге түсетiн көтерiңкi ауыртпалығы бар қызметi бойынша МТК қызметкерлерiнiң кәсiби жұмыс iстеу қабiлетiн қалпына келтiруге қызметтiң ерекше сипаты үшiн ұзақтығы 10 тәулiкке дейiн қосымша ақылы демалыс берiледi.
4. Қосымша демалыстар бiрiктiрiлiп, кезектi жылдық демалыспен бiрге немесе МТК қызметкерiнiң қалауы бойынша жеке берiлуi мүмкiн, бұл ретте қосымша және кезектi демалыстардың жалпы үздiксiз ұзақтығы 55 тәулiктен аспауы керек.
5. Залалды жағдайларда мiндеттерiн атқарғаны және қызметiнiң ерекше сипаты үшiн қосымша жылдық демалысқа хақылы МТК қызметкерлерiне қосымша демалыс, заңдарда көзделген жағдайларды қоспағанда, олардың қалауымен тек бiр негiз бойынша ғана берiледi.
48-бап. МТК қызметкерлерiнiң ақшалай үлесi
1. МТК қызметкерлерiнiң ақшалай үлесiне атқаратын штаттық лауазымы бойынша жалақы, берiлген арнаулы атағына қосымша ақы, әскери және құқықтық актiлермен көзделген басқа да мемлекеттiк қызмет түрлерi ескерiле отырып есептелетiн еңбек сiңiрген жылдары үшiн берiлетiн проценттiк үстемеақы, азық-түлiк паегiнiң құны (егер ол заттай берiлмесе), Қазақстан Республикасының Үкiметi және МТК Төрағасы белгiлейтiн басқа да ақшалай төлемдер кiредi.
2. Жасына байланысты жұмыстан босауға хақылы МТК
қызметкерлерiне есептелiп берiлуге тиiс зейнетақы сомасының 50
процентi мөлшерiнде ай сайын қосымша ақы белгiленедi.
49-бап. Жеке мiндеттi сақтандыру
МТК қызметкерлерi республикалық бюджет қаражаты есебiнен
мiндеттi жеке сақтандырылуға тиiс. МТК қызметкерi қаза тапқан немесе
мертiккен жағдайда залалды өтеу заңдарға сәйкес жүзеге асырылады.
VI Тарау
МТК-де ҚЫЗМЕТ ӨТКЕРУДI ТОҚТАТУ
50-бап. Қызмет өткерудi тоқтатуға негiздер
МТК-де қызмет өткерудi тоқтатуға мыналар негiз болады:
1) МТК-нен қызметтен босатылу;
2) Қазақстан Республикасының азаматтығынан айырылу;
3) Белгiленген тәртiппен МТК қызметкерiн хабар-ошарсыз кеттi
деп тану;
4) МТК қызметкерiнiң қайтыс болуы (қаза табуы);
5) заңдармен және осы Ережемен көзделген өзге де негiздер
бойынша.
51-бап. МТК-нен қызметтен босату үшiн негiздер
1. Запасқа (әскери есепке тұрғызыла отырып), егер қызметтен босатушылар Қазақстан Республикасының "Жалпыға бiрдей әскери мiндеттiлiк пен әскери қызмет туралы" Заңында белгiленген, әскери атағына сәйкес арнаулы атақтары бар және әскери қызметке денсаулық жағдайы бойынша жарамды адамдардың запаста тұруы үшiн шектi жасына жетпесе:
а) зейнеткерлiкке шығуға құқық беретiн еңбек сiңiрген жылдары
(қызмет өткеру мерзiмi) бойынша;
б) қызметте болудың шектi жасына жеткен кезде;
в) денсаулық жағдайына байланысты - әскери-дәрiгерлiк
комиссияның қорытындысы бойынша;
г) штаттардың қысқаруы немесе органдар мен бөлiмшелердi қайта
құруға байланысты басқа лауазымда пайдалануға мүмкiндiк болмаған
жағдайда;
д) контрактыны бұзуға байланысты;
е) өз тiлегiмен;
ж) басқа мемлекеттiк органдар мен ұйымдарға жұмысқа ауысуына
байланысты;
з) сынақ мерзiмi iшiнде қызметке жарамсыздығы байқалған
жағдайда;
и) аттестациялау тәртiбiмен қызметтiк сәйкессiздiгi бойынша;
к) қызмет тәртiбiн ұдайы бұзғаны үшiн;
л) абройына нұқсан келтiретiн әрекет жасағаны үшiн шығарылады;
м) соттың айыптау үкiмiнiң заңды күшiне енуiне байланысты
шығарылады.
2. Отставкаға (әскери есептен шығарыла отырып), егер босатушылар Қазақстан Республикасының "Жалпыға бiрдей әскери мiндеттiлiк пен әскери қызмет туралы" Заңында белгiленген, әскери атағына сәйкес арнаулы атағы бар немесе әскери-дәрiгерлiк комиссия денсаулық жағдайы бойынша әскери қызметке жарамсыз деп тапқан адамдардың әскери есептен шығарыла отырып запаста тұруы үшiн шектi жасына жетсе;
а) жасына қарай - Қазақстан Республикасының "Жалпыға бiрдей әскери мiндеттiлiк пен әскери қызмет туралы" Заңында белгiленген, әскери атағына сәйкес арнаулы атағы бар адамдардың запаста тұруы үшiн шектi жасына жеткен адамдар;
б) денсаулық жағдайына қарай - әскери-дәрiгерлiк комиссия денсаулық жағдайы бойынша әскери қызметке жарамсыз деп тапса, әскери есептен алына отырып шығарылады.
3. орта, аға және жоғары басшы құрамның арнаулы атақтары бар МТК қызметкерлерiне, осы баптың 1-тармағының "а", "б", "в", "г" - тармақшаларында және осы баптың 2-тармағының "а", "б"- тармақшаларында көзделген негiздер бойынша, зейнет демалысына шыққан кезде нысанды киiм киюге рұқсат берiледi.
52-бап. МТК қызметкерлерi үшiн белгiленген жасқа
байланысты шектеулер
1. Қатардағы және кiшi басшы құрамның арнаулы атақтары бар МТК-нiң қызметкерлерi жасы 45-ке жеткенше МТК органдарында қызметте бола алады.
2. Орта, аға және жоғары басшы құрамның арнаулы атақтары бар
МТК қызметкерлерi өздерiне берген арнаулы атақтарға қарай мына жасқа
жеткенше МТК органдарында қызметте бола алады:
1) әдiлет кiшi лейтенанттарынан әдiлет
полковниктерiне дейiн қоса алғанда 45 жас;
2) әдiлет полковниктерi 50 жас;
3) әдiлет генерал-майорлары,
әдiлет генерал-лейтенанттары 55 жас;
4) әдiлет генерал-полковниктерi 60 жас;
3. Осы бапта белгiленген МТК-де қызмет өткеру үшiн белгiленген шектi жасқа жеткен МТК қызметкерлерi, заңда және осы Ережеде көзделген өзге жағдайларды қоспағанда, қызметтен босатылуға тиiс.
4. Қызмет мүддесi үшiн оң аттестацияланған және медициналық жағынан ешқандай қайшылығы жоқ МТК қызметкерлерi дербес тәртiппен және өздерiнiң келiсiмiмен белгiленген шектi жастан тыс тағы да 5 жыл мерзiмге қызметте қалдырылуы мүмкiн, бұл мерзiмге осы қызметкерлердi лауазымға тағайындау құқығына ие бастықтар қалдыра алады. Мұндай жағдайда оларға өздерiнiң заңды құқығы бар зейнетақыларының 50 процентiн төлеу белгiленедi.
5. Ерекше жағдайларда ғана орта, аға және жоғары басшы құрамға кiретiн МТК қызметкерлерiн қызметте қалдыру мерзiмi осы тәртiппен тағы 5 жылға қайталанып ұзартылуы мүмкiн.
6. Қызметте қалдыру мерзiмiн ұзарту туралы шешiм осы Ережеде көрсетiлген негiздер бойынша МТК қызметкерiн жұмыстан босату мүмкiндiгiн жоққа шығармайды.
53-бап. МТК-нен қызметтен босату тәртiбi
1. Қатардағы және кiшi басшы құрамның лауазымдарында тұрған МТК қызметкерлерiн қызметтен өз құзыретiнiң шегiнде олардың төте бастықтары босатады.
2. Орта, аға және жоғары басшы құрамның лауазымдарында тұрған МТК қызметкерлерiн:
1) әдiлет подполковнигiне дейiн қоса алғанда - МТК Төрағасының орынбасарлары, облыстар, республикалық маңызы бар қалалар, Республика астанасы бойынша басқармалар (бас басқармалар) бастықтары, сондай-ақ МТК Төрағасы осындай құқық берген бастықтар;
2) әдiлет полковнигiне дейiн қоса алғанда және жоғары басшы құрамға кiретiн МТК қызметкерлерiн, егер заңда басқаша көзделмесе, МТК төрағасы босатады.
3. Контракт шарттарын бұзғаны үшiн, сондай-ақ осы Ереженiң 51-бабының 1-тармағындағы "и","к", "л", "м", тармақшаларына сәйкес қызметтен босатылғандарды қоспағанда, МТК қызметкерлерiн алдағы қызметтен босатылуы жөнiнде тiкелей бастықтары екi ай бұрын хабардар етедi.
4. Қайтыс болған, қаза тапқан, хабарсыз кеткен және арнаулы
атағынан айырылған МТК қызметкерлерi МТК Төрағасы айқындайтын
тәртiппен МТК қызметкерлерiнiң тiзiмiнен шығарылады.
54-бап. Зейнетақымен қамсыздандыру
МТК қызметкерлерiн зейнетақымен қамсыздандыру әскери
қызметшiлердi, iшкi iстер органдарының басшы және қатардағы
құрамдағы адамдарын зейнетақымен қамсыздандыру туралы заңдарға
сәйкес белгiленедi.
VII Тарау
МТК-де ЛАУАЗЫМЫН, АРНАУЛЫ АТАҒЫН ЖӘНЕ
ҚЫЗМЕТIН ҚАЙТА ҚАЛПЫНА КЕЛТIРУ
55-бап. МТК-де лауазымын, арнаулы атағын және қызметiн
қайта қалпына келтiрудiң негiздерi
1. Белгiленген тәртiппен қызмет бабында заңсыз немесе негiзсiз ауыстырылған, атқаратын лауазымынан босатылған немесе лауазымы төмендетiлген, арнаулы атағынан айырылған не арнаулы атағы төмендетiлген деп танылған, сондай-ақ МТК-нен заңсыз шығарылған МТК қызметкерлерiнiң тиiсiнше МТК-дегi лауазымы, арнаулы атағы, қызметi қайта қалпына келтiрiледi.
2. Қызметтiк тексеру нәтижелерi бойынша жасалған қорытынды, күшiне енген сот шешiмi немесе заңдарда белгiленген тәртiппен ақталған МТК қызметкерiнiң өз қызметiнде қайта қалпына келтiрiлуi жөнiндегi арызы МТК-дегi лауазымын, арнаулы атағын, қызметiн қайта қалпына келтiру үшiн негiз болып табылады.
56-бап. Қызметте қайта қалпына келтiрiлгеннен кейiн
қызмет өткеру мерзiмiн есептеу және арнаулы
атақ беру
Заңсыз босатылған, ал кейiннен МТК-дегi қызметi қайта қалпына келтiрiлген қызметкерлерге кезектi арнаулы атақ беру, проценттiк үстеме ақы төлеу және зейнетақы тағайындау үшiн еңбек сiңiрген жылдарын есептеу кезiнде ескерiлетiн үздiксiз қызмет стажына қызметтен босатылған сәтiнен оның қызметте қайта қалпына келтiрiлуi туралы бұйрыққа қол қойылған күнге дейiнгi уақыт қосылады.
57-бап. Келтiрiлген залалды өтеу
1. Сот үкiмiнiң заңды күшiне енуiне байланысты қызметтен босатылған, ол кейiннен заңда белгiленген тәртiппен ақталған МТК қызметкерлерiне келтiрiлген залалды өтеу заңдарға сәйкес жүзеге асырылады.
2. Қызмет бабында заңсыз немесе негiзсiз ауыстырылған, лауазымы немесе атағы төмендетiлген, органдардан шығарылған МТК қызметкерлерiне қызметтен босатылған кезде атқарған лауазымы, тиесiлi арнаулы атағы бойынша МТК-дегi лауазымы, арнаулы атағы мен қызметi қайта қалпына келтiрiлгенге дейiнгi уақыт үшiн, бiрақ үш айдан аспайтын уақыт үшiн, ақшалай үлесi төленедi. Ал қызметтен босатылып, қызметi қайта қалпына келтiрiлгенге дейiн ұйымдарда жұмыс iстеген, кәсiпкерлiкпен шұғылданған қызметкерлерге МТК-дегi соңғы лауазымы бойынша алған ақшалай үлесi мен қызметiндегi мәжбүрлi үзiлiс кезiнде тапқан нақты табысының арасындағы айырмашылық өтеледi.
3. Қызмет бабында ауыстыру, лауазымын, арнаулы атағын төмендету, МТК-ден шығару туралы заңды бұза отырып шешiм қабылдаған немесе МТК-де лауазымын, арнаулы атағын және қызметiн қайта қалпына келтiру туралы шешiмнiң орындалуын кiдiрткен МТК-нiң лауазымды
адамды тәртiптiк жауапкершiлiкке тартылады және қызмет бабында
заңсыз немесе негiзсiз ауыстырылу, лауазымы немесе арнаулы атағы
төмендетiлу, МТК-нен шығарылуы себебiмен қызметкерге жасалатын
төлемдерге байланысты МТК-не келтiрiлген залалды еңбек туралы заңда
белгiленген мөлшерде өтейдi.
VIII тарау
ҚОРЫТЫНДЫ ЕРЕЖЕЛЕР
58-бап. МТК-не қызметке ауысқан iшкi iстер органдарының,
прокуратураның, салық полициясының қызметкерлерi
мен әскери қызметшiлерге арнаулы атақтар беру
мен еңбек сiңiрген жылдарын есептеудiң ерекшелiктерi
1. МТК-не қызметке кiрген iшкi iстер органдарының, прокуратураның, салық полициясының қызметкерлерi мен әскери қызметшiлер қатардағы және басшы құрамның тиiстi лауазымдарына тағайындалғаннан кейiн олардың бұрынғы әскери және арнаулы атақтары, сыныптық шендерi МТК қызметкерлерiнiң арнаулы атақтарына теңестiрiледi.
2. Арнаулы атақтарда еңбек сiңiрген жылдардың мерзiмi, запаста тұрған мерзiмiн қоспағанда, олардың берiлген күнiнен бастап әскери және арнаулы атақтарда, сыныптық шендерде еңбек сiңiрген жылдары ескерiле отырып есептеледi.
3. Аталған қызметкерлерге МТК-дегi еңбек сiңiрген жылдары, әскери қызметке немесе еңбек қызметiне байланысты орын алған үзiлiстерге қарамастан, әскери және арнаулы атақтар, сыныптық шендер беру көзделген лауазымдарда жұмыс iстеген уақыты ескерiле отырып есептеледi.
59-бап. Соғыс уақытында және төтенше жағдай енгiзiлген
жерлерде қызмет өткеру тәртiбi
МТК қызметкерлерiнiң соғыс уақытында және төтенше жағдай енгiзiлген жерлерде қызмет өткеру ерекшелiктерiн заңдарға сәйкес Қазақстан Республикасының Президентi айқындайды.
60-бап. МТК қызметкерлерiн жерлеу
1. МТК-нiң қайтыс болған немесе қаза тапқан қызметкерлерi мен зейнеткерлерiн жерлеу үшiн олардың үш айлық ақшалай үлесi мөлшерiнде бiр жолғы ақшалай өтемақы төленедi. жерлеу рәсiмiн ұйымдастыру МТК тиiстi органдарының бастықтарына жүктеледi.
2. МТК қызметкерлерiн жерлеу кезiнде құрмет көрсету тәртiбiн
МТК Төрағасы айқындайды.
61-бап. МТК-де қызмет өткеру және оның шарттарын
сақтау тәртiбiн қадағалау
МТК-де қызмет өткеру және оның сақтау заңдылығын қадағалауды
Қазақстан Республикасының бас прокуроры мен оған бағынысты
прокурорлар жүзеге асырады.
62-бап. МТК-де қызмет өткеру туралы заңдарды
бұзғаны үшiн жауапкершiлiк
МТК-де қызмет өткеру туралы заңдар бұзған, МТК қызметкерлерiн
құқықтық және әлеуметтiк қорғау кепiлдiктерi сақталмаған жағдайда
кiнәлi адамдар заңмен белгiленген жауапкершiлiкке тартылады.
Қазақстан Республикасы
Президентiнiң
1966 жылғы 14 маусымдағы
N 3035 Жарлығымен
Бекiтiлген
Қазақстан Республикасының Мемлекеттiк тергеу
комитетi мен оның органдары қызметкерлерiнiң
АНТЫ
Мен,__________________________________________________________
(тегi, аты, әкесiнiң аты)
Қазақстан Республикасының азаматы, Мемлекеттiк тергеу комитетi органдарына қызметке кiре отырып, құқық тәртiбi мен заңдарды нығайтудағы өз жауапкершiлiгiмдi сезiне отырып:
- Қазақстан Республикасының халқына адал болуға;
- Қазақстан Республикасының Конституциясын сақтауға, өз қызметiмде Қазақстан Республикасы заңдарының, жарғылардың, бұйрықтар мен осы Анттың талаптарын бұлжытпай басшылыққа алуға;
- азаматтардың, қоғам мен мемлекет құқықтарын, бостандықтары мен заңды мүдделерiн қылмыстық қол сұғудан жан аямай қорғауға, шынайы, турашыл және әдiл болуға;
- өзiме жүктелген мiндеттердi абыроймен орындап, Мемлекеттiк
тергеу комитетi қызметкерiнiң ар-намысын қастерлеуге, мемлекеттiк
және қызметтiк құпияны сақтауға;
- өз тарапынан жол берiлген қандай да болсын заңды, қызмет
тәртiбiн бұзушылықтың, лайықсыз мiнез-құлықтың Мемлекеттiк тергеу
комитетiнiң беделiне дақ түсiретiнiн, мемлекет мүддесiне нұқсан
келтiретiнiн есте ұстауға салтанатты түрде ант етемiн.
Егер мен өзiмнiң қабылданған Антымды бұзатын болсам, онда
Қазақстан Республикасының заңдарымен белгiленгендей жауап беруге
дайынмын.
19__ ж. "__"______________ _______________
(жеке қолы)
